Չեմպիոնների լիգայի չեմպիոնների չեմպիոնը

Մադրիդի «Ռեալի» գլխավոր մարզիչ Ժոզե Մոուրինիոն Չեմպիոնների լիգայի 1/8 եզրափակիչի` «Լիոնի» դեմ հանդիպումից առաջ հայտարարել է, որ համոզված է երկու խաղի արդյունքում իր թիմի հաղթանակի մեջ, հաղորդում է Marca-ն:

Պորտուգալացի մասնագետը նշել է, որ «Ռեալի» ֆուտբոլիստները ֆրանսիացիների հետ հանդիպումից առաջ հանգիստ են և հոգեկան լարվածություն չունեն: «Մենք պատրաստ ենք այս դիմակայությանը և պատրաստվում ենք երկու խաղն էլ անցկացնել առանց թերարժեքության բարդույթի: Մենք «Ռեալն» ենք, Չեմպիոնների լիգայի չեմպիոնների չեմպիոնը: Թիմը պետք է հավատա իր ուժերին և ճնշում գործադրի մրցակցի վրա: Պետք է նշեմ, որ «Ռեալի» բոլոր ներկայացուցիչները բացասական հիշողություններ ունեն` «Լիոնի» հետ կապված: Բայց օրինակ ես ու Կարվալիուն հաղթել ենք այդ թիմին «Պորտուի» կազմում, ինչից հետո նվաճեցինք Չեմպիոնների լիգայի հաղթողի կոչումը»,- ասել է արքայական ակումբի գլխավոր մարզիչը: