Քաղաքապետարանը, Կոմայգու հետ կապված, ժամանակ է շահում

Երեկ «Մենք» երիտասարդական շարժումը Երեւանի քաղաքապետարանին նամակ է հղել` Կոմայգիում տեսախցիկներ եւ դարպասներ դնելու պահանջով:

Yerkir.am-ի հետ զրույցում «Մենք» երիտասարդական շարժման փոխնախագահ Սեւան Աղաջանյանը նշեց, որ քաղաքապետարանը չի ընդունել իրենց նամակը: «Նամակը չընդունվեց քաղաքապետարանի նամակների բաժնի աշխատակցի կողմից` պատճառաբանությամբ, թե դիմումի ձեւի մեջ սխալմունք կար: Սակայն բանն այն է, որ օրեր առաջ, մենք նամակ էինք գրել քաղաքապետարան նույն ձեւով, եւ այդ նամակի պատասխանը ստացանք»,- ասում է նա ու հավելում, որ քաղաքապետարանը ցանկանում է ձգձգել Կոմայգու հարցի լուծումը, դրա համար էլ իրենց նամակը չընդունեցին. «Ուղղակի ժամանակ են շահում: Մենք, իհարկե, կփոխենք նամակի ձեւը ու նորից կուղարկենք այն»:

Ի դեպ, երեկ ակտիվիստները նամակ են փոխանցել նաեւ ԱՄՆ դեսպան Ջոն Հեֆերնին` հորդորելով չխառնվել Հայաստանի ներքին կյանքին, քանի որ դեսպանն իր մտագոհությունն էր հայտնել Կոմայգու համասեռամոլների դեմ կատարվող ակցիայի կապակցությամբ: Աղաջանյանը նշեց, որ դեսպանատունն ընդունել է իրենց նամակը եւ խոստացել պատասխանել: