Փաստաբանը Քոչարյաններից 1 մլն է պահանջում

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր ավարտվեց  «Հայր և որդի Քոչարյաններն ընդդեմ «Սկիզբ մեդիա կենտրոնի» գործով նախնական դատական նիստը: Դատավոր  Ալեքսեյ Սուքոյանը դատաքննության օր նշանակեց հուլիսի 2-ը:

Փաստաբան  Նիկոլայ Բաղդասարյանը, ով ներկայացնում է «Սկիզբ մեդիա կենտրոն» ՍՊԸ-ի շահերը, այսուհետ կպաշտպանի նաև  «Առաջին լրատվական» ՍՊԸ-ի շահերը, որին  դատարանը որպես պատասխանող կողմ է ճանաչել: Փաստորեն, կողմերը քանակապես հավասարվեցին` երկու հայցվոր ընդդեմ երկու պատասխանողի:

Դատական ծախսերի համար Բաղդասարյանը դատարանին խնդրեց համապարտության կարգով Քոչարյաններից բռնագանձել 1 մլն դրամ: Ըստ նրա` եթե հայցվոր կողմը վնասի հատուցման համար 5 մլն դրամի պահանջ է ներկայացրել, ապա իրենց պահանջած 1 մլն դրամը ողջամիտ է:

 «Եթե գտնում եք 1 մլն դրամը ողջամիտ է, ես ողջունում եմ»,- հայտարարեց հայցվորների ներկայացուցիչ Արփինե Մելիքբեկյանը:

Ի դեպ, հայցվոր կողմը 5 մլն դրամից  4 միլիոնը  պահանջում է  «Քոչարյանների րոպեավճարը» եւ «Ի՞նչ կապ ունեն Քոչարյանը եւ Ծառուկյանը «Նաիրիտի» հետ» հրապարակումների համար` յուրաքանչյուրի համար 2-ական մլն, իսկ մնացած 1 մլն դրամը դատական ծախսերն են:

Նիկոլայ Բաղդասարյանը հայտարարեց, որ «Առաջին լրատվականը» որևէ առնչություն չունի վիճարկվող հոդվածների հրապարակման հետ, ուստի ինքը չպետք է ապացույցներ ներկայացնի մի բանի մասին, որը գոյություն չունի: Սակայն, ըստ նրա, եթե պարզվի, որ կապ կա այդ ընկերության և հրապարակված հոդվածների միջև, իրենք կբարձրացնեն հոդվածների մեկնաբանության հարցը և համերաշխության եզրեր կգտնեն:

Դատարանը կողմերին պարզաբանեց, որ հայցվոր կողմը պետք է հիմնավորի, որ «Առաջին լրատվականը» հրապարակել է հոդվածները, իսկ պատասխանողը պետք է ապացուցի, որ հրապարակումները զրպարտություն հանդիսացող տեղեկություններ չեն պարունակում:

Հիշեցնենք, որ, ըստ հայցապահանջի, Քոչարյանները «Առաջին լրատվական»-ի հիմնադիր «Սկիզբ մեդիա կենտրոն»-ից և «Առաջին լրատվական»-ից պահանջում են հերքել վերոհիշյալ վերտառությամբ հոդվածները, վճարել 5.000.000 դրամ իրենց իրավունքների ու պաշտպանության համար կատարած ծախսերը հոգալու համար: