Օր ու արև չպետք է տանք Սերժ Սարգսյանին. Նիկոլ Փաշինյան

Ազատության հրապարակում ելույթ ունեցավ նաեւ ԱԺ ՀԱԿ խմբակցության պատգամավոր Նիկոլ Փաշինյանը: Նա նախ հայտարարեց, որ լսել էր, թե հանրահավաք չի կայանալու: «Սա որ չկայացածն է, պատկերացրեք  կայացածն ինչպես պետք է լինի»,- ասաց պատգամավորը:

Փաշինյանը հայտարարեց, որ Հայաստանում տեղի ունեցած ընտրությունների արդյունքներով Հայաստանը դե ֆակտո ունեցավ նորընտիր նախագահ՝  ի դեմս Րաֆֆի Հովհաննիսյանի, սակայն հայ ժողովրդին չի հաջողվում դե յուրե հաստատել Հովհաննիսյանի նախագահությունը:

Անդրադառնալով երեկ ՀՀ նախագահի նստավայրում Սերժ Սարգսյան-Րաֆֆի Հովհաննիսյան հանդիպմանը` նա նշեց. «Երեկ Րաֆֆի Հովհաննիսյանն իր աշխատասենյակում ընդունել էր Սերժ Սարգսյանին, ոչ թե` հակառակը»:

Ժողովրդի պարտությունը բացառելու համար Փաշինյանն առաջարկում է թույլ չտալ, որ հրոսակներն ուժ գործադրեն ժողովրդի նկատմամբ, չգնալ որևէ պայմանավորվածության ապօրինի իշխանության հետ: «Սերժ Սարգսյանը չի եղել և երբեք էլ չի լինի ՀՀ նախագահ»,- հայտարարեց նա և հավելեց, որ օր ու արև չպետք է տալ Սերժ Սարգսյանին: