Հերքում են` Արթուր Բաղդասարյանը չունի ավտոշարասյուն

ԱԱԽ քարտուղար Արթուր Բաղդասարյանի մամլո խոսնակը հերքում է այսօր մամուլում տարածված լուրը, թե փողոցի երթևեկությունը կանգնեցվում է Արթուր Բաղդսարյանի ավտոշարասյան համար:

«Ազգային անվտանգության խորհրդի քարտուղար Արթուր Բաղդասարյանը չունի ավտոշարասյուն: Արթուր Բաղդասարյանին ուղեկցող անվտանգության 2 մեքենաները (որի իրավունքը նա ունի ի պաշտոնե) երբևէ  հասարակական կարգ չեն խանգարել թե' Երևանում, թե' ՀՀ մարզերում:

Մեքենաները տեղաշարժվում են բացառապես երթևեկության կանոններին համապատասխան:  Ինչ վերաբերում է որևիցե մեկից վախենալուն կամ որևէ մեկին վախեցնելուն, ապա ակնհայտ է, որ Արթուր Բաղդասարայանը` որպես մարդ,  որպես քաղաքական ու պետական գործիչ, ապրում, աշխատում և գործում է այնպիսի սկզբունքներով, որոնք որևէ հիմք չեն տալիս որևէ մեկից վախենալու, առավել ևս, ինչ-որ մեկին վախեցնելու համար: Հետևաբար «Ժողովուրդ» թերթում տպագրված հոդվածը հորինված ապատեղեկատվություն է, որն իրականությանը չի համապատասխանում»,- գրված է մամլո հաղորդագրության մեջ: