Արթուր Բաղդասարյանը կարող է վոլեյբոլի հեղինակությունը բարձրացնել. Ռուբեն Հայրապետյան

«Վոլեբոլի ֆեդերացիան էդ ի՞նչ մի կարեւոր կառույց ա, որ անարդարություն լինի»,- լրագրողների հետ հանդիպման ժամանակ, անդրադառնալով Վոլեյբոլի ֆեդերացիայի նախագահի ընտրությանը, նշեց ՀՖՖ նախագահ, նախկին պատգամավոր Ռուբեն Հայրապետյանը:

Ըստ նրա` դա «հերթական հասարակական կազմակերպություններից է, ինչպես ՀԱՕԿ-ը, Ֆուտբոլի ֆեդերացիան»: Հայրապետյանի խոսքով` սպորտի նախարարությունն է կազմակերպում ֆեդերացիաների ընտրությունները:

«Սպորտի նախարարն է որոշում, սպորտի նախարարության կանոնակարգում է ասված, թե ընտրություններն ինչպես անցնեն»,-վստահեցրեց նա, նաեւ նշեց, որ այս ամենից սկանդալ սարքելը բարոյական չէ: «Արթուր Բաղդասարյանն այն մարդկանցից է, որ կարող է սպորտաձեւ ղեկավարել: Կարող է վոլեյբոլի հեղինակությունը բարձրացնել: Պարտադիր ա՞` անպայման ինչ-որ կուսակցությունից լինի այդ ֆեդերացիայի նախագահը, թող տարբեր լինեն, ի՞նչ ա եղել»,- դժգոհեց Հայրապետյանը: