ՀՀԿ-ն միանգամից երկու նապաստակ է խփում

Yerkir.am-ն արդեն տեղեկացրել է, որ այս ընտրություններում իշխանության միակ գլխացավանքը մասնակցության բարձ ցուցանիշ ապահովելն է:

Մեր տեղեկություններով` ՀՀԿ-ն հարցն արդեն քննարկել է մարզպետերի հետ, մարզպետերն էլ, իրենց հերթին, իրենց մոտ են հրավիրում գյուղապետերին ու քաղաքապետերին եւ հրահանգներ իջեցնում: Այս ամենը համակարգում է ՀՀԿ շտաբի պետի տեղակալ Արմեն Գեւորգյանը:

Ուշագրավ է, որ այս ընտրություններում նախագահ Սերժ Սարգսյանի համար հստակ ձայներ ապահովելուն զուգահեռ մարզպետերը, գյուղապետերը եւ քաղաքապետերը ազատորեն գործելու որոշակի շրջանակ են ունենալու: Մեր աղբյուրները հաղորդում են, որ, օրինակ, ուսուցիչների վրա Սերժ Սարգսյանի օգտին ձայներ ապահովելու հարցը այնքան էլ խիստ չի դրվի: Նրանց թեեւ կստիպեն անպայման գնալ ընտրության, բայց Սերժ Սարգսյանի օգտին քվեարկելու խիստ հրահանգ չեն իջեցնի: Այդ կերպ ՀՀԿ-ն փորձում է «երկու նապաստակ խփել», նախ` կրթված մարդկանց մոտ տպավորություն ստեղծել, որ ազատ են ընտրության հարցում, ճնշումներ չկան, եւ երկրորդ` արհեստականորեն բարձրացնել այլ թեկնածուների ձայները: