8 տարվա ազատազրկում` հայուհիների թրաֆիքինգի համար

3 հայուհիների, այդ թվում` մեկ անչափահասի թրաֆիքինգի ենթարկելու մեջ մեղադրվող  Արմինեին դատարանը դատապարտեց  8 տարվա ազատազրկման (ՀՀ Քր.օր-ի 132.1 հոդվածի 2-րդ մասով` 18 տարին չլրացած անձին և երկու կամ ավելի անձանց սեռական շահագործման ենթարկելը):

Դատավորի որոշումը հարուցեց կնոջ անչափահաս դստեր բարկությանը: Նա հենց դատարանում երդվեց սպանել մոր դեմ ցուցմունք տված Լուիզային և, ոտքով հրելով դատարանի դուռը, «սպանելու եմ» գոռալով հեռացավ:

Նման դատավճռի չէր սպասում նաև Արմինեն, ով իր  վերջին խոսքում դատարանից պահանջել էր իր նկատմամբ արդարացման դատավճիռ կայացնել, քանի որ պնդում էր, որ ինքն ընդամենը օգնել է աղջիկներին: Արմինեն հավաստիացրեց ներկաներին, որ իրեն անպայման արդարացնելու են, և որ մինչև Եվրադատարան գնալու է:

Հիշեցնենք, որ, ըստ մեղադրանքի, Թուրքիայում վարսահարդարի, մոդելավորողի, բնակարանների մաքրությամբ զբաղվողների` բարձր վարձատրվող աշխատանքի կեղծ խոստումներ տալով'` Արմինեն խաբեությամբ հավաքագրել էր անչափահաս Լուիզային և 2 այլ աղջիկների, կազմակերպել նրանց փոխադրումը Թուրքիայի Մարմարիս քաղաք,  որտեղ, օգտագործելով նրանց խոցելիությունը` հետադարձի ճանապարհածախսի գումար չունենալը, լեզվին չտիրապետելը և տեղանքին ծանոթ չլինելը, ստիպել էր նրանց զբաղվել մարմնավաճառությամբ: