15 տարվա ազատազրկում` Լեդի Հակոբի եղբորորդու համար

Մալաթիա-Սեբաստիա վարչական շրջանների ընդհանուր իրավասության դատարանում շարունակվեց  Մալաթիայի նախկին թաղապետի որդու՝ Սեդրակ Զատիկյանի սպանության պատվերի գործով հերթական դատական նիստը:

Մեղադրող դատախազ Արմեն Մարուխյանն առաջարկեց  գործով ամբաստանյալ  Ստեփան Հակոբյանին  (ԱԺ նախկին պատգամավոր Հակոբ Հակոբյանի` Լեդի Հակոբի եղբորորդուն) մեղավոր ճանաչել ՀՀ ՔՕ 38-104 հոդվածի մասով եւ դատապարտել 14, իսկ 235 հոդվածով` 2 տարվա ազատազրկման:  Սակայն  համաներման ակտով պատիժները մասնակի կրճատել և նրա նկատմամբ վերջնական պատիժ սահմանել 15 տարվա ազատազրկումը:

Տուժող կողմը ևս միացավ դատախազի առաջարկին: Տուժողի իրավահաջորդի ներկայացուցիչ Վաղարշակ Գևորչգյանը հայտարարեց, որ սպանվածի հարազատներն իրեն փոխանցել են` Հակոբյանի համար առաջարկել առավելագույն պատիժ:

Մեղադրող Արմեն Մարուխյանն իր ճառում ներկայացրեց, որ Ստեփան Հակոբյանի մեղքը ապացուցվել է մի շարք վկաների ցուցմունքներով, հեռախոսային վերծանումների արձանագրություններով: Դատախազն ուշադրություն հրավիրեց վերծանումներից հատկապես մի դրվագի վրա: Նրա խոսքով` ապացուցվել է, որ  Սեդրակ Զատիկյանի սպանության համար դատապարտված Արսեն Առուշանյանը սպանությունից 5 րոպե անց զանգահարել է Ստեփան Հակոբյանին և ասել. «Ախպերնե'ր, սաղ լավ ա, տղա ա»:  Նշենք, որ Արսեն Առուշանյանը իր գործով դատաքննության ընթացքում հերքել էր այդ փաստը` ասելով, որ նման ցուցմունք տվել է նախաքննական մարմնի ճնշումների հետևանքով:

Ամբաստանյալը չի ընդունում իրեն առաջադրված  մեղադրանքը: Նա  դատարանում հրաժարվել էր ցուցմունք տալուց և դատավարության մասնակիցների, այդ թվում՝ իր պաշտպանի հարցերին պատասխանելուց:  

Ըստ մեղադրանքի` Ս.Հակոբյանը, Նարեկ Խաչատրյանի հետ նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով, դրդել, պատվիրել են սպանել Սեդրակ Զատիկյանին: Բացի այդ` Ստեփան Հակոբյանը մեղադրվում է նաև ռազմամթերք հանդիսացող փամփուշտներ ապօրինի կերպով ձեռք բերելու և մինչև 2006թ. հունիսի 23-ն ապօրինի կերպով պահելու մեջ՝ ըստ մեղադրական եզրակացության: Դրանք հայտնաբերվել են 2006 թվականի հունիսի 23-ին` նրան պատկանող տանը կատարված խուզարկությամբ:  

Հիշեցնենք, որ Սեդրակ Զատիկյանը սպանվել էր 2006թ. հունիսի 22-ին` ժամը 14:45-ի սահմաններում, Սեբաստիա և Տիչինա փողոցների խաչմերուկում՝ «ԱԿՍ» տեսակի ինքնաձիգից արձակված կրակոցներից:  

Հաջորդ դատական նիստին` նոյեմբերի 26-ին` Հակոբյանի պաշտպան Երեմ Սարգսյանը հանդես կգա պաշտպանական ճառով: