Կրպակատերերը շարունակում են բողոքել /լրացված

Ապամոնտաժվող կրպակների տերերն այսօր էլ բողոքի ակցիա են անցկացնում Կառավարության  մոտ, որտեղ այսօր հերթական նիստն է տեղի ունենում:

Հավաքված մոտ 100 ցուցարարները, ովքեր բողոքում են Երեւանի քաղաքապետ Կարեն Կարապետյանի որոշման դեմ, սպասում են կառավարության նիստի ավարտին:

ԱԺ «Ժառանգություն» խմբակցության ղեկավար Ստյոպա Սաֆարյանը, ով այժմ ցուցարարների հետ է, նամակ է ուղղել Երեւանի քաղաքապետին:

«Ժառանգություն» խմբակցության պատգամավորներ Անահիտ Բախշյանն ու Արմեն Մարտիրոսյանը կառավարության նիստից հետո հանդիպում են ունեցել վարչապետ Տիգրան Սարգսյանի հետ:

Նա տեղեկացրել է, որ աշխատող կրպակների զանգվածային փակում չի լինելու` թույլ չտալու սոցիալական լարվածություն, կցուցաբերվի անհատական մոտեցում, խիստ անհրաժեշտության դեպքում կրպակները կապամոնտաժվեն, եթե դրանք քաղաքային տնտեսության համար ստեղծում են խնդիր:

Անահիտ Բախշյանը նիստից հետո հայտարարել է,  որ իր դիտարկմամբ` այս կառավարությունն այնքան էլ չի ողջունում քաղաքապետարանի քայլերը, սակայն Երեւանը դարձել է պետություն պետության մեջ, իսկ Կարեն Կարապետյանն էլ` այդ «պետության» ղեկավարը:

Հիշեցնենք, որ մամուլում արդեն իսկ հրապարակումներ կան այն մասին, որ կրպակների ապամոնտաժման պատճառով լարվել են քաղաքապետի եւ վարչապետի հարաբերությունները, քանի որ ժողովուրդը քաղաքապետարանի այդ որոշման պատճառով կառավարությունից է բողոքում: