Հաքերները կոտրել են 295 հայկական կայք /Լրացված/

Այսօր emPer0rshiP անունով հաքերների խումբը կոտրել է Smart Systems ընկերության սերվերը: Վիրտուալ այս հարձակման հետեւանքով խափանվել է հայկական 295 կայքի աշխատանք:

Այդ կայքերը մուտք գործելիս գլխավոր էջում ադրբեջաներենով հոխորտանք է գրված «էրմենիների» հասցեին, պատկերված է մահմեդական մահիկը:

Տեքստում, մասնավորապես, հետեւյալն է գրված. «Տարիներ շարունակ այս երկրում ազատ ապրել եք: Ստել եք: Մինչև մեր ոտքը չեք տրորել, ձեզ ոչինչ չենք ասել, իսկ դուք այս երկրի զավակներին ցեղասպանության մեջ եք մեղադրել: Ձեր ասածն ի նպաստ ձեզ եք օգտագործել: Բայց, անշուշտ, մեզ զգացմունքներով չեն ղեկավարում, սրանից հետո այդքան հանգիստ կարող եք չլինել»:

Այստեղից կարելի է ենթադրել, թե ովքեր կարող են լինել այս հանցագործության հեղինակները:

Այս մասին հաղորդում է PCNews.am-ը:

Լրացում: Քիչ առաջ Smart Systems-ի հիմնադիր Ստեփան Ասլանյանից տեղեկացանք, որ ընկերության ամբողջ անձնակազմն այս պահին աշխատում է վերականգնել կոտրված կայքերը:

«Աշխատելու ենք ողջ գիշեր, եւ հուսով եմ շատ արագ կվերականգնենք հարձակումից տուժած բոլոր կայքերը: Համենայն դեպս տուն չենք գնա մինչև ամբողջը չվերականգնենք»,- «Երկիր»-ին ասաց Ստեփան Ասլանյանը:

Լրացում:  Ադրբեջանական հարձակումից շատ չանցած, հարձակման են անցել հայ հաքերները: Որպես պատասխան` հայ հաքերների mozambicoArmeniCo խումբը կոտրել է ավտոբիզնեսով զբաղվող ադրբեջանական մի խոշոր ընկերության կայք: Հայ հաքերները ադրբեջանական կայքում  տեղադրել են. «Հասնենք Սասուն, մտնենք Վան, Մուշ, Ալաշկերտ, Արդահան» երգի բառերը:Ինչպես ասում են`հարվածը եղել է, հուժկու, կործանարար և վերջնական: