ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Համակարգիչ չեն սովորել

«ՉԻ» տեղեկություններով` ՀՀ ֆինանսների նախարարության աշխատանքները վերջին շրջանում գրեթե կաթվածահար վիճակում են: Բանն այն է, որ այդ գերատեսչության աշխատակիցներն այդպես էլ չեն սովորում նոր կարգերին, օրինակ` այդպես էլ չեն կարողանում օգտվել վերջերս ներդրված էլեկտրոնային փաստաթղթաշրջանառության ծառայությունից:

Ֆինանսների նախարարը, ինչպես գիտեք, ՀՀ վարչապետ Տիգրան Սարգսյանի կադրն է, եւ այս նախարարությունում հիմնականում հավաքված են այս զույգի յուրայինները: Հենց նրանք է, որ չեն կարողանում օգտվել այս ծառայությունից, ինչի արդյունքում խնդիրներ են առաջացել  ֆինանսական հոսքերի վերահսկողության մասով:

Այսինքն` ֆինանսների նախարարության պարտքերը տարբեր գերատեսչություններին ոչ թե ավանդույթ դարձած «բյուջեի ճեղվածքներ» արտահայտությամբ կամ երեւույթով է պայմանավորված, այլ պարզապես մեր չինովնիկները հապաղում են ջանք թափել ու հնարավորինս արագ յուրացնել էլեկտրոնային փաստաթղթաշրջանառություն կոչվող ծառայության աշխատանքային կանոնները: