ԱՌԱՎՈՏ. Լյուդմիլա Սարգսյանին չեն ճանաչում

Haynews.am կայքը հարցազրույց է տպագրել այս օրերին Հայաստանում գտնվող ՍԴՀԿ Կենտրոնական վարչության անդամ, Լիբանանի խորհրդարանի երկարամյա պատգամավոր Եղիկ Ջերեջյանի հետ:

Անդրադառնալով «Հնչակյան» կուսակցության գրանցման փաստին եւ հակադարձելով «Առավոտում» ՍԴՀԿ ատենապետ Լյուդմիլա Սարգսյանի մոտեցումներին` կայքի զրուցակիցն ասել է. «Դա քաղաքական պահի, օրենքի թելադրություն էր, որ եղավ: Բոլոր խոսակցություններն ավարտելու համար պետք է հստակ նշեմ. այսօրվա գրանցված կուսակցությունը ներկայացնում է 124 տարվա Սոցիալ-դեմոկրատ Հնչակյան կուսակցությունը` իր աշխարհասփյուռ ողջ կառույցներով, պատմությամբ ու փառավոր կենսագրությամբ, ինչպես նաեւ քաղաքական ներկայով:

Մնացյալը Լյուդմիլա Սարգսյանի հերթական փչոցն է: Կեդրոնական վարչությունում միշտ էլ տիրել է ինքնաքննադատ մթնոլորտ, ինչը խորհուրդ կտայի շատ եւ շատ այլ կուսակցությունների:

Այս հարցում, բնականաբար, կուսակցության կարծիքը միասնական է եւ փոփոխման ենթակա չէ: Մենք Հայաստանում չենք ճանաչում Լյուդմիլա Սարգսյանին եւ վերջ»:

Պարոն Ջերեջյանը նաեւ մի քանի խոսք է ուղղել իր հին ընկերոջը` Լեւոն Տեր-Պետրոսյանին. «Եթե կան հարցեր, որոնց շուրջ կարող ենք միատեսակ մտածել, կարող էինք համագործակցել, սակայն սա չի նշանակում, որ Հնչակյան կուակցությունը ՀԱԿ-ի, ՀՀՇ-ի եւ որեւիցե այլ քաղաքական ուժի կցորդը կարող է լինել: Մենք եղել ենք եւ կմնանք ինքնուրույն քաղաքական ուժ»: