Սոցիոլոգի հեքիաթը

Հայաստանի քաղաքացիները համարում են, որ դեռ վաղ է խոսել ընտրությունների մասին.  լրագրողների հետ հանդիպման ժամանակ տեղեկացրել է Սոցիոլոգների հայկական ասոցիացիայի նախագահ Գեւորգ Պողոսյանը` ներկայացնելով դեկտեմբեր-հունվարի ամիսներին անցկացված հարցման արդյունքները:

Այնուամենայնիվ, հարցման մասնակիցների կարծիքով` առաջիկա ընտրություններում կհաղթի Հանրապետական կուսակցությունը, երկրորդ տեղում «Բարգավաճ Հայաստանն» է, երրորդ տեղում` ՀՅ Դաշնակցությունը: Հայ ազգային կոնգրեսը եւ Ժողովրդական կուսակցությունը համարյա նույնչափ ձայներ են հավաքել:

Ընտրությունների արդյունքները պայմանավորված կլինեն նաև Ղարաբաղյան հիմնախնդրի հետ, որը, ըստ բանախոսի, կարծես, սրվում է:

Ըստ Գ. Պողոսյանի` այս ամենից կարելի է եզրակացնել, որ ընդհանուր պատկերը չի փոխվել, թեեւ դժվար է կանխատեսել, թե ինչ կլինի ընտրությունների ժամանակ: «Ժողովրդի համար միեւնույն է, թե ով կընտրվի: Մարդկանց համար կարեւորը նորմալ սոցիալական պայմաններում ապրելն է»,- նշեց ասոցիացիայի նախագահը: Նրա խոսքերով` բնակչության մոտ ընտրություններից 3 ամիս առաջ է տեսակետ ձևավորվում թեկնածուների վերաբերյալ:

Պողոսյանը պնդեց, որ Հայաստանի բնակչությունը կուսակցություններին ճանաչում է իր լիդերներով` բացառությամբ Դաշնակցության ու ՀՀԿ-ի:

Նշենք, որ սոցիոլոգը հարցման արդյուքները թվային հարաբերակցությամբ չներկայացրեց, փոխարենը հայտարարեց, թե իբր արտագաղթի գլխավոր պատճառը պատերազմի վտանգն է, ոչ թե սոցիալական ծանր կացությունը:

Պայծառատեսությո՞ւն, թե՞ իշխանության մշակված քաղքականություն` դատեք ինքներդ:

Կ. ՀԱՐՈՒԹՅՈՒՆՅԱՆ