Շուրջ 6 ամիս անց Մովսես գյուղում ճանապարհները «սուտի-մուտի» են սարքված․ սահմանակից թաղամասը կիսադատարկվել է

«Փաստինֆո»-ն գրում է․ «Մատաղ քեզ, ամբողջը խնդիր է էլի, որից սկսես, որից դուրս գաս։ Էդ ա՝ ճամփեքը սարքեցին սուտի-մուտի», – «Փաստինֆո»-ին սրտնեղած պատմեց Մովսես գյուղի բնակչուհի Քնար տատիկը, որի տունն ու թշնամու սահմանը բաժանում է 100 մետրը։

Դեռ փետրվարին Քնար տատիկը «Փաստինֆո»-ին պատմել էր, որ գյուղի ճանապարհը խորդուբորդ է, իսկ լուսավորություն ընդհանրապես չկար։

«Էդ ա՝ սարքեցին սուտի-մուտի։ Գյուղի մասին չեն մտածում, ցավդ տանեմ։ Էնքան բաներ կան անելու․ վայեննի են, ճանապարհ ա, պետք ա նորմալ լինի։ Ես մեր թաղի ճանապարհների մասին եմ մտածում։ Բերում են շիկահող են փռում, սելավը գալիս ա, տանում, լցնում կանալը։ Արածը զրո ա էլի», – պատմեց Մովսես գյուղի բնակչուհին։

Գրեթե 6 ամիս առաջ էլ տատը պատմել էր, որ տեղի իշխանությունները փորձել են մասամբ կարգավորել հարցը։ Նա նշել էր, որ իդեալական ասֆալտ չի արվել, բայց հող են լցրել ու հարթեցրել։

Հետաքրքրվեցինք նաև գյուղի լուսավորության մասին, և Քնար տատիկը պատմեց, որ դա էլ նորմալ չէ։

«Լուսավորությունն էլ նորմալ չի։ Վերևի թաղամասային ճանապարհ կա, սյուներ, լույս են դրել, շատերը բողոքում են, որ չի վառվում։ Դե չի վառվում, ի՞նչ անենք։ Կենտրոնական ճանապարհները մեր թաղամասից մինչև Խաչի հրապարակը լավ երևում են», – ասաց Քնար տատը։

Տարեց և սրտացավ բնակչուհին պատմում է, որ գյուղում իրավիճակը հանգիստ է, սակայն խորդուբորդ փողոցներով գյուղը կիսադատարկ է, հատկապես՝ իրենց թաղամասը․ մնացել են մի քանի ծեր մարդկանցով։