Ամուլսարի ընդերքը՝ Վայոց Ձորի առողջության և ապագայի «սպառնալիք»․ Հայկազ Հարությունյան

Բժիշկ, ՀՅԴ անդամ Հայկազ Հարությունյանը գրում է.

«Որպես Վայոց Ձորում ծնված և մեծացած բժիշկ, իմ պարտքն եմ համարում բարձրաձայնել Ամուլսարի հանքի շահագործման աղետալի հետևանքների մասին: Այն, ինչ փորձում են ներկայացնել որպես տնտեսական առաջընթաց, իրականում մեր բնության, առողջության և ապագայի գիտակցված ոչնչացում է՝ հանուն կարճաժամկետ շահույթի:

2020 թվականից հետո մեր երկիրն ապրեց պատերազմի ծանր հետևանքները, իսկ Ջերմուկը՝ իմ հարազատ Վայոց Ձորի ամենագեղեցիկ քաղաքներից մեկը, դարձավ թշնամու թիրախ: Այսօր մենք չենք կարող թույլ տալ, որ այս վտանգի տակ գտնվող տարածքում գործարկվի հանք, որի ցիանիդային հարթակն առաջին իսկ ռազմական գործողության դեպքում կարող է վերածվել մահաբեր աղետի: Ջերմուկի ջրերը Հայաստանի ամենամաքուր աղբյուրներից են, և դրանց թունավորումը կդառնա ազգային անվտանգության սպառնալիք: Ավելին, մենք տեսնում ենք, թե ինչպես է կառավարությունը ոչ միայն աչք փակում այս վտանգների վրա, այլև խթանում հանքի շահագործումը՝ նոր վարկային միջոցներ ներգրավելով «Լիդիան Արմենիա» ընկերության համար: Սա նշանակում է, որ Հայաստանի կառավարությունը ոչ միայն չի պաշտպանում իր քաղաքացիներին, այլև պետական երաշխիքներով գումար է ներգրավում մի ծրագրի համար, որը կարող է Վայոց Ձորը վերածել աղետալի գոտու:

Որպես բժիշկ՝ ես չեմ կարող հանդուրժել այն փաստը, որ առողջարանային Ջերմուկի բնակչությունն ու հյուրերը կդառնան հանքարդյունաբերական փորձարկման օբյեկտներ: Որպես Վայոց Ձորցի՝ ես կտրականապես մերժում եմ մեր հայրենի բնության ու առողջության վաճառքը միջազգային կորպորացիաների շահերի համար: Որպես Հայաստանի քաղաքացի՝ պահանջում եմ, որ կառավարությունը դադարեցնի Ամուլսարի շուրջ թաքուն ֆինանսական գործարքները և վերջ դնի այս հանքային ծրագրին, որը սպառնում է մեր երկրի կենսունակությանը:

Հայաստանի ապագան պետք է կառուցվի առողջ տնտեսության, բնության պահպանման և մեր քաղաքացիների բարեկեցության հիման վրա, այլ ոչ թե կործանարար հանքարդյունաբերության միջոցով: Ջերմուկն առողջության վայր է, ոչ թե ցիանիդային փորձադաշտ»: