Ստամբուլում լույս է տեսել Ավետիս Հաջյանի «Թուրքիայի գաղտնի հայերը» գիրքը

Ստամբուլում «Իլեթիշիմ» հրատարակչատան կողմից լույս է ընծայվել լրագրող Ավետիս Հաջյանի «Թուրքիայի գաղտնի հայերը» գիրքը։ Այդ մասին հայտնում է www.akunq.net – ը՝ վկայակոչելով թուրքական լրատվամիջոցները։

Աղբյուրի համաձայն՝ Աւետիս Հաջյանը գրքի հրատարակման առթիվ նշել է․ «Ընտանիքս, ընկերներս, գործընկերներս ու անծանոթները հնարավոր դարձրին այս գիրքը: Նրանց նվիրյալ աջակցության շնորհիվ այս գիրքը գրելու համար անցա ճամփորդությունների և ուսումնասիրությունների միջով, որոնք ավելի քան չորս տարի տևեցին: Այն ամենը, ինչ արժեքավոր է այս էջերում, մեծ մասամբ նրանց աշխատանքն է: Իսկ անխուսափելի վրիպակներն ու սխալները միայն իմն են»։

«Թուրքիայի գաղտնի հայերը»  գիրքը պատմում է 1915 թ․ Ցեղասպանությունից մազապուրծ հայերի մասին: Այս մարդկանց՝ «ծպտյալ» կամ «թաքնված» հայերին գտնելու ջանքերը Հաջյանին ուղղորդում են Սեբաստիայից Վան, Բաղեշից Այնթափ՝ երկար ու դժվարին ճանապարհորդության։ Նա հանդիպում է տարբեր խմբերի՝ ցեղասպանությունից առաջ կամ հետո մահմեդականություն ընդունած հայերի, ինչպես նաև նրանց, ովքեր փորձել են պահպանել իրենց հավատքը, և բացահայտորեն պնդում են, որ հայ են և նրանց, ովքեր կտրականապես հերքում են իրենց հայ լինելը:    

Թուրքական աղբյուրը՝ https://www.habereguven.com/bir-kitap-oku-bin-dusun-avedis-hadjian-turkiyenin-gizli-ermenileri

Թարգմանեց Տիգրան Չանդոյանը

www.akunq.net