Հայաստանում ՌԴ դեսպանատունը մեկնաբանել է վանդալիզմի դեպքը

Հայաստանում Ռուսաստանի Դաշնության դեսպանատունն մեկնաբանել է Երևանում «Լենինգրադի պաշարման երեխաներին» հուշարձանի նկատմամբ տեղի ունեցած վանդալիզմի առնչությամբ։

«Մենք խորապես վրդովված ենք «Լենինգրադի պաշարման երեխաներին» հուշարձանի մոտ ցինիկ սադրանքից։ Դժվար է նման գործողությունները համարել այլ բան, քան բացահայտ պղծման արտահայտություն այս ողբերգության զոհերի և քաղաքը պաշտպանած հերոսների հիշատակի դեմ։ Տեսանյութի հեղինակը ոտնահարել է ոչ թե Լենինգրադի ֆաշիստական շրջափակումից լիակատար ազատագրման 80-ամյակի կապակցությամբ հուշահամալիրում դրված ծաղկեպսակներ, այլ հայ ժողովրդի այն լավագույն հատկանիշների խորհրդանշների նկատմամաբ հարգանքի տուրքը և երախտագիտությունը։

Բանականության մեջ չի տեղավորվում նրանց անբարոյականության աստիճանը, ովքեր հրապարակավ բացահայտ արհամարհում են ոչ միայն այդ ողբերգական իրադարձությունների և նրանց զոհերի, այլև սեփական նախնիների հիշատակի նկատմամբ հարգանքը։ Ըստ հետազոտողների՝ Լենինգրադի բազմազգ պաշտպանների շարքերում կռվել են ավելի քան 100 հազար հայեր, որոնցից 4 հազարը կամավորներ են եղել, իսկ տասը արժանացել են Խորհրդային Միության հերոսի կոչման։

Ուրախ ենք, որ մեր գնահատականը կիսում են հայ հասարակության մեջ, ինչի վկայությունն է սոցցանցերում այս տգեղ արարքի առնչությամբ տարածված զանգվածային վրդովմունքի ալիքը։

Դեսպանատունը հույս է հայտնում, որ այս գործողությունները կստանան համապատասխան իրավական գնահատական Հայաստանի իշխանությունների կողմից, և այս սադրանքի մասնակիցները պատասխանատվության կենթարկվեն»,-ասվում է տարածված հայտարարության մեջ։

Ավելի վաղ հայտնել էինք, որ ՌԴ Քննչական կոմիտեի նախագահ Ալեքսանդր Բաստրիկինը կարգադրել է քրեական գործ հարուցել Երևանում պաշարված Լենինգրադի երեխաների հուշարձանի պղծումից հետո։