Ռուսաստանի և Ուկրաինայի միջև պատերազմը բացում է նոր սառը պատերազմի դարաշրջանը. Էրդողանի խորհրդական

Ուկրաինայի դեմ Ռուսաստանի սկսած պատերազմը լուրջ փոփոխությունների կհանգեցնի աշխարհում. աշխարհը թեւակոխում է Սառը պատերազմի նոր դարաշրջան, և մենք պետք է պատրաստվենք դրա հետևանքներին։ Այս մասին Ստամբուլի նախագահական Դոլմաբահչե նստավայրում ԱՄՆ Կոնգրեսի անդամների հետ հանդիպման ժամանակ ասել է Թուրքիայի նախագահի խոսնակ Իբրահիմ Քալընը։

Նրա խոսքով,՝ նոր իրողությունները կազդեն բազմաթիվ ոլորտների վրա, այդ թվում՝ սննդի, էներգետիկայի, կիբերանվտանգության և այլն։

Քալընը հիշեցրել է Անկարայի խաղաղապահ ջանքերը Սև ծովի հյուսիսում պատերազմին վերջ տալու ուղղությամբ։ Դրա վառ վկայությունն են դարձել Ռուսաստանի Դաշնության և Ուկրաինայի ներկայացուցիչների հանդիպումները Անթալիայում և Ստամբուլում։ Քալընի խոսքով՝ Ստամբուլում Ուկրաինայի և Ռուսաստանի պատվիրակությունների հանդիպումից հետո շատերը խաղաղության հույս ունեին, բայց հետո իրավիճակը կրկին բարդացավ։

Նա նաև ուշադրություն է հրավիրել այն պատժամիջոցների վրա, որոնք նախկինում կիրառվել են Թուրքիայի դեմ՝ ի պատասխան Ս-400 հակաօդային պաշտպանության համակարգերի գնման։ «Մենք պետք է մոտեցնենք մեր դիրքորոշումները, մինչդեռ ՆԱՏՕ-ի դաշնակիցների նկատմամբ սահմանափակումները հակասում են գործընկերության ոգուն»,- ընդգծել է Քալինը։

Իր հերթին, ամերիկացի սենատոր Ռիչարդ Շելբին Թուրքիային անվանել է «ԱՄՆ-ի նշանակալի բարեկամ»։

«Թուրքիան ԱՄՆ-ի համար շատ կարևոր բարեկամ է, և մենք այստեղ ենք՝ աջակցելու այս բարեկամությանը առևտրի, դիվանագիտության և պաշտպանական կապերի համատեքստում։ Թուրքիան եղել և մնում է ՆԱՏՕ-ի հավատարիմ անդամ. սա այն է, ինչ մենք հարգում ենք»,- ասել է կոնգրեսականը։