Բաքվի և Երևանի միջև խաղաղության պայմանագիրը կապահովի խաղաղություն տարածաշրջանում. Էրդողանի խորհրդական

Ադրբեջանի և Հայաստանի միջև խաղաղության պայմանագրի ստորագրումը կապահովի խաղաղություն ողջ տարածաշրջանում: Այդ մասին երեքշաբթի հայտարարել է Թուրքիայի նախագահի մամուլի քարտուղար Իբրահիմ Քալընը:

«Ղարաբաղի հետ կապված հարցեր կան, որոնք լուծման կարիք ունեն: Հրադադարի մասին համաձայնագիր է ստորագրվել, սակայն խաղաղության պայմանագիր դեռ չկա: Խաղաղության պայմանագիրը խաղաղություն կբերի ամբողջ տարածաշրջանին, և սա ամենաճիշտ մոտեցումն է: Նախագահ  Ալիևը նույնպես որոշ հայտարարություններ է արել այս հարցի վերաբերյալ: Եթե կարճ ժամանակում ստորագրվի խաղաղության պայմանագիր, և լուծվեն տեխնիկական հարցեր, ինչպիսիք են ականապատ դաշտերի քարտեզների տրամադրումը, գործընթացը կարագանա»,- ասել է Քալընը, որին մեջբերում է Haber Global-ը:

Էրդողանի մամուլի քարտուղարը նշել է, որ համաձայնագիրը օգուտ կբերի Հայաստանին և նրա քաղաքացիներին: «Այս հակամարտությունը պետք է ավարտվեր, և այն ավարտվեց»,- հավելել է նա: