Թուրքիան պատրաստ է Ռուսաստանի դեմ պատերազմի. Էրդողանի խորհրդական

Թուրքիան Ռուսաստանի դեմ պատերազմել է 16 անգամ և պատրաստ է դարձյալ պատերազմ սկսել, մեր վրեժը սարսափելի կլինի. այս մասին թուրքական իշխանամետ A Haber հեռուստաընկերության եթերում հայտարարել է Թուրքիայի նախագահ Ռեջեփ Թայիփ Էրդողանի խորհրդական, Անվտանգության և արտաքին քաղաքականության նախագահական կոմիտեի անդամ Մեսութ Հաքքը Ջաշընը:

Բացի այդ՝ Ջաշընը նշել է, որ ՌԴ-ում ապրում է ավելի քան 25 մլն մուսուլման և խոստացել է, որ «Ռուսաստանը ներսից կմասնատվի»:

Yerkir.am-ն արդեն տեղեկացրել է, որ այսօր գիշերը Սիրիայի կառավարական ուժերը Իդլիբում հարվածներ էին հասցրել ահաբեկչական և հակառավարական ուժերին, որի ժամանակ սպանվել էին նաև 33 թուրք զինվորներ, որոնք, ըստ ՌԴ ՊՆ-ի, այնտեղ չպետք է գտնվեին:

Հիշեցնենք, որ Ջաշընի հիշատակած 16 պատերազմների ճնշող մեծամասնությունը անփառունակ ելք է ունեցել Թուրքիայի (այդ ժամանակ Օսմանյան կայսրության, քանզի Թուրքիայի Հանրապետության ստեղծումից՝ 1923 թ. հետո ռուս-թուրքական պատերազմ չի եղել) համար: