Կարեն Բիշարյանը, որը պայքարում էր որ Ռոբերտ Քոչարյանը անպայման մնա կալանքի տակ, դարձավ Վերաքննիչի դատավոր․ Սևակ Հակոբյան

Հիշո՛ւմ եք, 2018-ի «գունավոր» հեղաշրջումից հետո առաջինը ինչ արեցին․ հարուցեցին մի շինծու գործ, որը պետք էր միմիայն մի նպատակով՝ մեկուսացնել Ռոբերտ Քոչարյանին։ Թե ինչի էր պետք, շատերը հասկացան դրանից 2 տարի անց, ովքեր ավելի շուտ էին հասկացել, նրանց կամ չէին լսում, կամ ռիսկ չէին անում բարձրաձայնել։ Այս մասին գրել է Yerevan.Today-ի գլխավոր խմբագիր Սևակ Հակոբյանը:

«Ուրեմն սրանք էդ գործը որ հարուցեցին, Հայաստան անկախ պետության միանգամից 3 գեներալ-գնդապետ հայտնվեց քրեական հետապնդման տակ, նրանցից ՀԱՊԿ գործող գլխավոր քարտուղար Յուրի Խաչատուրովը հետ կանչվեց, Հայաստանը կորցրեց ՀԱՊԿ ղեկավարելու լիազորությունը։ Պաշտոնաթող նախագահ Ռոբերտ Քոչարյանին ամեն գնով գրեթե 2 տարի պահեցին կալանքի տակ․ վերջում, իհարկե, պարզվեց, որ այդ ամենը ոչ միայն սուտ էր, հլը մի բան էլ էն գլխից Սահմանադրությանը հակասող, այսինքն՝ անօրինական։ Կարճվեց գործը։

Իսկ ովքե՞ր էին այդ գործը պաշտպանում, ու ամենից կարևորը՝ որտե՞ղ են հիմա։

Սասուն Խաչատրյանը, որ այդ գործի նախաձեռնողն էր, հերիք չէ՝ չհեռացվեց համակարգից, պատիժ չստացավ, մեկ այլ՝ ավելի լայն լիազորություններով հիմնարկ բացեցին, որ ինքն էլ դառնա դրա ղեկավար՝ «Հակակոռուպցիոն կոմիտե» անունով ինչ-որ բանի նախագահ նախագահ։ Իր սորոսական եղբայրը «օդից» դարձավ ԲԴԽ անդամ։

Դատախազներ, Գևորգ Բաղդասարյանը՝ դե էն տղան, էն որ 2020-ի մայիսի 9-ին դատարանի դահլիճում Շուշին ազատագրած Քոչարյանին, Խաչատուրովին ու Օհանյանին ասում էր՝ մենք ձեզ ստեղ Շուշին ազատագրելու համար չենք դատում․․․ Հիշեցի՞ք․ այ էդ Գևորգը 2018 թվականի օգոստոսին նշանակվեց գլխավոր դատախազի տեղակալ՝ փաստացի Դատախազության երկրորդ դեմքն է մինչ այսօր․ չի պատժվել՝ պաշտոնի առաջխաղացումը եղել և մնում է։

Մյուսը՝ Պետրոս Պետրոսյանը, դատախազության ավագ դատախազից 2020 թվականին նշնակվեց է Կոտայքի դատախազ։ Գործը կարճվելուց հետո չի պատժվում, մնում է բարձրացված պաշտոնին։ Արշակ Կարապետյան անունով գեներալ ունեինք, որին Սերժ Սարգսյանը ապրիլյանից հետո հեռացրել էր Զինված Ուժերի համակարգից, սրան գտան, 2018-ին բերեցին, մի ցուցմունք կորզեցին, որի հիման վրա էլ նախագահ Քոչարյանին 2 տարի պահեցին կալանավորված, իսկ դրա դիմաց 2018 թվականին նշանակվեց ՀՀ վարչապետի խորհրդական, 2021 թվականի ապրիլի 13-ից մինչև հուլիսի 20-ը ՀՀ ԶՈւ գլխավոր շտաբի պետի առաջին տեղակալ։ Դե հետո էլ, գիտեք, Պաշտպանության նախարար էր։ Նրան ևս որևէ կերպ պատիժ չհասավ, գոնե պարտության բերած պատերազմի ժամանակ գերագույն գլխավորին առնվազն սխալ խորհուրդներ տալու համար, այլ գործից հանեցին, որովհետև, ըստ մամուլի, բացի հայկականից, ունեցել է նաև ռուսաստանյան քաղաքացիություն, Նիկոլը վախեցել է ավելորդ շուխուռից։

Այսօր էլ հերթական առաջխաղացման ականատեսը եղանք՝ դատախազ Կարեն Բիշարյանը, որը նույն կերպ դոշով պայքարում էր որ Ռոբերտ Քոչարյանը անպայման մնա կալանքի տակ, դարձավ Վերաքննիչ քրեականի դատավոր։ Էլի չի պատժվել, միայն առաջխաղացում է ունեցել։ Ընդ որում, էս մարդու պարագան հատկապես զավեշտալի է նրանով, որ նույն թվականի մարտ ամսին ԱԺ ամբիոնից մարտի 1-ի մասով լրիվ ուրիշ բան ասաց, իսկ հուլիսին՝ տրամագծորեն հակառակը։ Հետո պարզվեց՝ մինչև հեղաշրջումն ասած բաները ավելի ճիշտ էին։ Ուղղակի մարդը երևի ուզեցել էր ինքն էլ կարիերա անի, էս թվարկված պաշտոնյաներից ո՞ր մեկից էր պակաս։

Մտածում եմ՝ եթե այս տրամաբանությունը շարունակվելու է, կարող են Արթուր Դավթյանին շուտով Ամենայն Հայոց Կաթողիկոս կարգել, չէ՞ որ իր ջանք ու եռանդը շատ ավելի մեծ է եղել պատերազմող երկրի 3 գեներալ գնդապետներին քրեական հետապնդման տակ պահելու, իսկ նախագահ Քոչարյանին այնպես մեկուսացնելու հարցում, որ անգամ 2 Նոր տարիներին թոռներին չտեսնի, մինչև Նիկոլն իր սև գործը կաներ»,- գրել է նա։