Քովիդի դեմ պատվաստված մարդկանց մեջ վիճակահանություն է լինելու, նրանք ստանալու են թատրոնի, օպերայի տոմսեր. Անահիտ Ավանեսյան

«Սուրբ Գրիգոր Լուսավորիչ» բժշկական կենտրոնն իր դռներն է բացել արդեն վերանորոգված, սարքավորումներով համալրված վիճակում: Այս մասին այսօր լրագրողներին հայտնել է առողջապահության նախարարի պաշտոնակատար Անահիտ Ավանեսյանը «Սուրբ Գրիգոր Լուսավորիչ» ԲԿ-ի ախտորոշիչ բաժանմունքի բացման ժամանակ:

«Այս բժշական կենտրոնը լինելու է մեր ուշադրության կենտրոնում, և ամբողջ համալիրը, որը բաղկացած է ծննդատնից և պոլիկլինիկայից, պետք է բերենք այսպիսի մակարդակի»,- ասել է նա։

Նախարարն անդրադարձել է կորոնավիրուսին և, համավարակով պայմանավորված, հայաստանյան իրավիճակին ու ընդգծել՝ թվերի աճ է գրանցվել: 

«Գրանցում ենք աճը, որը կտրուկ չէ, և գիտակցում ենք, որ աշնանը կունենանք նոր վարակի ալիք։ Իսկ ինչ վերաբերում է դելտա շտամին, այս պահին չունենք շտամներ, բայց կարծում ենք, որ այն Հայաստանում շրջանառվում է, քանի որ ունենք բաց սահմաններ»,- նշել է նախարարը:

Նա անդրադարձել է նաև քովիդի դեմ պատվաստումներին և ասել, որ աշխատանքներ են տարվում նոր պատվաստանյութերի խմբաքանակի ձեռք բերման համար:

«Մենք հետաքրքիր գործիքակազմ ենք մտածել պատվաստման ցուցանիշը բարձրացնելու համար և ուշադրությունը դեպի մշակույթ ենք ուղղել․ շուտով պատվաստվողները վիճակահանության միջոցով կունենան թատրոնների, օպերաների տոմսեր»,- ասել է Ավանեսյանը: