Ողջույններ Շուշի այցելած հույն դեսպանին. Ադրբեջանն առաջին անգամ պատվիրակություն է ուղարկելու ինքնահռչակ Հյուսիսային Կիպրոսի թուրքական հանրապետություն

Թուրքիայի խորհրդարանի արտաքին հարաբերությունների հանձնաժողովի նախագահ Ակիֆ Չաղաթայ Քըլըչը պատմական է համարել Ադրբեջանի խորհրդարանական պատվիրակության առաջիկա այցը Հյուսիսային Կիպրոսի թուրքական հանրապետություն (ՀԿԹՀ): Այս մասին Քըլըչը հայտարարել է Անկարայում Ադրբեջանի խորհրդարանի Միլի մեջլիսի միջազգային հարաբերությունների և միջխորհրդարանական կապերի հանձնաժողովի նախագահ Սամեդ Սեյիդովի հետ հանդիպման ժամանակ:

Նրա խոսքով՝ Ադրբեջանի պատվիրակության առաջին այցը Լեֆկոշա կդառնա կարևոր ուղերձ ամբողջ աշխարհին:

Քըլըչը նշել է, որ Ադրբեջանը և Թուրքիան վստահորեն նայում են ապագային՝ հավատարիմ մնալով «Մեկ ժողովուրդ, երկու պետություն» սկզբունքին։ «Թուրքիան հպարտ է Ադրբեջանի հաջողություններով»,- նշել է նա:

Այսօր Թուրքիայի խորհրդարանի շենքում տեղի կունենա Թուրքիայի, Ադրբեջանի և ՀԿԹՀ խորհրդարանական պատվիրակությունների հանդիպումը: Դրանից հետո՝ հունիսի 16-ին, Ադրբեջանի խորհրդարանական պատվիրակությունը կայցելի Կիպրոսի հյուսիս:

«Սա Ադրբեջանի խորհրդարանական պատվիրակության առաջին այցն է ՀԿԹՀ: Պատվիրակությունը կմասնակցի Կիպրոսում խաղաղության գործողության մեկնարկի 47-ամյակին և հուլիսի 20-ին`Խաղաղության և ազատության օրվան նվիրված միջոցառմանը: Միջոցառմանը մասնակցելու է նաև թուրքական պետության ղեկավարը: Մենք շնորհակալ ենք ձեզ այս կարևոր քայլի համար: Սա կարևոր ուղերձ է ամբողջ աշխարհին և Ադրբեջանի ու Թուրքիայի միջև բարեկամության և եղբայրության հերթական ցուցադրում»,- ասել է նա։

Հիշեցնենք, որ օրեր առաջ Հունաստանի դեսպանը Ադրբեջանում այցելել էր ադրբեջանական օկուպացիայի տակ գտնվող Շուշի քաղաքը։