Հյուսիսային Կիպրոսը հաստատել է հայ և հույն ֆերմերներին օգնելու ծրագիր

Հյուսիսային Կիպրոսի նախարարների խորհուրդը հաստատել է տեղի հույն և հայ ֆերմերներին օգնելու վերաբերյալ ծրագիր. տեղեկացնում է «Ակօս»-ը:

Ըստ Fileleftheros կայքի՝ Հյուսիսային Կիպրոսի գյուղատնտեսության նախարար Նիկոս Քույալիսը հայտարարել է, որ երկու տարբեր ծրագրեր են հաստատվել՝ 700.000 և 250.000 եվրո արժողությամբ: 250.000 եվրո բյուջեով ծրագիրը նախատեսվել է 45-ից ցածր տարիքի երիտասարդ ֆերմերների, անասնաբույծների, ձկնորսների և մեղվաբույծների համար: Նախարարը հայտնել է, որ ծրագիրը հասանելի է այն հույն և հայ ընտանիքներին, որոնք ապրում են Հյուսիսային Կիպրոսում:

Հայտարարության համաձայն՝ ծրագրին դիմողները պետք է ունենան առնվազն 100 ակր տարածք, 50 անասուն և 250 փեթակ: Այս պահանջին համապատասխանելու դեպքում կցուցաբերվի 5000 եվրո, իսկ մեղվաբույծներին՝ մոտ 2500 եվրո գումար:

Ինչ վերաբերում է պրոֆեսիոնալ ձկնորսներին՝ նրանց, ովքեր ունեն 4-412 մետրի սահմաններում մակույկ կամ նավակ, կտրամադրվի 2000, իսկ մյուսներին՝ 1000 եվրո օգնություն:

Օգնություն կտրամադրվի նաև փոքր բիզնեսով զբաղվելու ցանկություն ունեցող անձանց: Նրանց կտրամադրվի 2000 եվրո ֆինանսական աջակցություն: