Զարիֆը հորդորել է Իրանի ժողովրդին՝ զգույշ լինել Իսրայելի ծուղակը չընկնելու համար

Իսրայելը մասնակցել է Նաթանզում կիրակի օրը տեղի ունեցած միջուկային վթարին, որի նպատակը միջուկային գործարքի շուրջ բանակցությունները խափանելն էր: Այս մասին երկուշաբթի ասել է Իրանի արտաքին գործերի նախարար Մոհամադ Ջավադ Զարիֆը:

«Իսրայելցի քաղաքական գործիչները և զինվորականները բացահայտ ասում են, որ թույլ չեն տա առաջընթաց գրանցել ու վերացնել պատժամիջոցները, և այսօր նրանք կարծում են, որ հասել են իրենց նպատակին»,- ըստ ՏԱՍՍ-ի՝ ասել է Զարիֆը՝ պատասխանելով Նաթանզի միջադեպի վերաբերյալ հարցին:

Իրանցի դիվանագետը հավելել է, որ «Իսրայելին պատասխանը կլինի Իրանի՝ էլ ավելի մեծ առաջընթացը միջուկային ոլորտում»:

Զարիֆը հավելել է, որ «Իրանի վերնախավն ու ժողովուրդը պետք է զգույշ լինեն, որպեսզի չընկնեն Իսրայելի իշխանությունների ստեղծած խելացի ծուղակը»: