Հասմիկ Պողոսյանը Շուշան Պետրոսյանին խնդրեց զգույշ լինել հայտարարություններում

ԱԺ ՀՀԿ խմբակցության պատգամավոր Շուշան Պետրոսյանը կառավարության հետ հարցուպատասխանի ժամանակ հարց ուղղեց մշակույթի նախարար Հասմիկ Պողոսյանին: Պատգամավորի հարցը վերաբերում էր օպերայի և բալետի թատրոնի տնօրենի թափուր պաշտոնի համար հայտարարված մրցույթին:

«Ճանաչում եմ թեկնածուներից մի քանիսին: Նրանք ակնհայտորեն մշակույթի գործիչներ են: Բայց ուզում եմ հարցնել, թե ի՞նչ սկզբունքով եք առաջնորդվելու`  տնօրենի թեկնածուների հետ կապված»,- հարցրեց Շուշան Պետրոսյանը:

Մշակույթի նախարարը նշեց, որ առաջնորդվում է ոչ թե ինքը, այլ առաջնորդվելու են ՊՈԱԿ-ի մասին օրենքով, որը ստեղծելու է հանձնաժողով՝ մրցույթն անցկացնելու համար: «Կարևոր դեր կխաղա այն, թե ինչ հայեցակարգ կներկայացնեն թեկնածուները: Կառավարման ոլորտը մարդուց պահանջում է որոշակի գիտելիքներ, և միայն մեկ ոլորտի գիտելիքները բավական չեն լինելու: Իսկ հանձնաժողովը սահմանված կարգով կանցկացնի մրցույթը»,- ասաց նա:

Արձագանքելով` Շուշան Պետրոսյանը նշեց, որ տնօրենի պաշտոնի համար գրանցված ինը թեկնածուներից միայն մեկն է ներկայացրել ծրագիր:

Մշակույթի նախարար Հասմիկ Պողոսյանը հակադարձեց. «Խնդրում եմ նման հայտարարություններ չանել, որովհետև ապակողմնորոշում եք ողջ հասարակությանը: Բոլոր թեկնածուները ներկայացրել են իրենց փաստաթղթերն ու հայեցակարգը, այլ հարց է, որ մի թեկնածու որոշել է հրապարակել, իսկ մնացածը ներկայացրել են իրենց հայեցակարգը իրենց փաստաթղթերում: Զգույշ լինենք, որովհետև առաջին անգամ տնօրենը ոչ թե նշանակվում է, այլ` ընտրվում՝ օրենքի բոլոր կանոններով, բաց ու թափանցիկ»,- ասաց նախարարը: