Վրաստանում Թուրքիայի դեսպանը զարմացած է այդ երկրում թուրքաֆոբ և իսլամաֆոբ քարոզչությունից

Վրացական հասարակությունը դեմ էր Ռիոնի հովտում Նամախվանի հիդրոէլեկտրակայանի կասկադի կառուցմանը տարածաշրջանի էկոլոգիային սպառնացող վտանգի պատճառով և բողոքի ցույց էր կազմակերպել նախատեսված շինարարության վայրում, ինչը Թուրքիային դուր չի եկել:

Թբիլիսիում Թուրքիայի դեսպան Ֆաթմա Չերեն Յազգանը նշել է, որ ինքը զարմացած է ու անհանգստացած հակաթուրքական, թուրքաֆոբ, որոշ դեպքերում իսլամաֆոբ քարոզչությունից. հայտնում է SOVA.NEWS-ը:

«Սա ավելի մտահոգիչ է, քանի որ ես հարգում եմ վրացական մշակույթը, ուղղափառ դավանանքը վրացական ինքնության բաղկացուցիչ մասն է, բայց երբ շինհրապարակում խաչ է կանգնեցվում և նշվում, որ չեն ցանկանում թուրքական ընկերություն Վրաստանում, ես կասկածներ ունեմ, որ դա այն Վրաստանը չէ, որը ես գիտեմ»,- ասել է դեսպանը։

Ըստ նրա՝ ԶԼՄ-ներում շահարկումներ կան հիդրոէլեկտրակայանի կառուցման առիթով, և դրանք կարող են դադարեցվել, եթե թուրքական ընկերությունը սկսի բացահայտ խոսել տեղի ունեցածի մասին: Ըստ նրա` բնապահպանական ցանկացած խնդիր պետք է գիտականորեն լուծվի:

Սա հերթական ապացույցն է, որ թուրքական կապիտալը գրավել է Վրաստանի գրեթե ամբողջ տնտեսությունը, իսկ հասարակ վրաց ժողովուրդն արդեն հարկադրաբար պարում է «թուրքական դուդուկի տակ»։