Վրաստանում Թուրքիայի դեսպանը հայտարարել է, որ ոչ ոք չի պատրաստվում գողանալ Ռիոնի գետի ջուրը Թուրքիայի համար

Վրաստանում Թուրքիայի դեսպան Ֆաթմա Ջերեն Յազգանն արձագանքել է Նամախվանիի ՀԷԿ-ի շուրջ ծավալվող իրադարձություններին: Թուրք դիվանագետը նշում է, որ ողջունում է բոլոր որոշումները և հայտարարությունները, որոնք նպաստում են գործընթացի թափանցիկությանը:

«Այս նախագիծն իրականացվում է Վրաստանի և վրացիների համար, այն չի կառուցվելու վրացիների դեմ: Ես ողջունում եմ, որ կառավարությունն աշխատում է վստահությունը վերականգնելու ուղղությամբ և երկխոսության մեջ է այն մարդկանց հետ, որոնք դեմ են ՀԷԿ-երի կառուցմանը և հատկապես՝ այս նախագծին: Պետք է երկխոսություն տեղի ունենա կառավարության, թուրք-նորվեգական Enka ընկերության և նախագծի հակառակորդների միջև: Կարծում եմ՝ մի փոքր ուշ է, բայց գործընթացը սկսվել է, ինչը լավ է: Ուրախ եմ նաև, որ ապատեղեկատվությունն ու քարոզչությունը, որոնք ուղղված էին իմ երկրի՝ Թուրքիայի դեմ, աստիճանաբար մարում է:

Հաղորդակցությունը պետք է լիներ ոչ միայն իշխանությունների և ընկերության կողմից, այլ պետք է լինեին նաև հասարակական կազմակերպություններ, որոնք այսօր այս նախագծի վերաբերյալ հարցեր ունեն։ Այն տարիների ընթացքում, երբ նախագիծը մշակվում էր, նրանք ակտիվություն չէին ցուցաբերում: Այս ամենը նկատի ունենալով, այո, շփման մեջ որոշ ընդհատումներ են եղել, և ես այստեղ չեմ, որպեսզի մատնանշեմ հատկապես ինչ-որ մեկին՝ անձի կամ իշխանությանը: Ես հասկանում եմ, որ ընտրություններից հետո երկրում այլ մտահոգություններ կային, բայց կարծում եմ, որ, ցավոք, թարգմանության ընթացքում տեղեկատվության մի մասը կորել է»,- ասել է թուրք դեսպանը՝ արդարացնելով Թուրքիայի՝ Վրաստանի բնությանը վնաս հասցնելու քայլերը։

Նրա խոսքով՝ Նամախվանիի ՀԷԿ-ի շուրջ տեղի ունեցած իրադարձությունները թուրք ներդրողների շրջանում հարցեր են առաջացրել, թե արժե՞ ներդրումներ կատարել Վրաստանում:

«Ներդրողներն ինձ արդեն հարցեր են տալիս, և ես հավաստիացնում եմ նրանց, որ ապատեղեկատվությունն ու քարոզչությունը հիմնականում Վրաստանից չեն, և որ թուրք գործարարների համար բարենպաստ միջավայր է ստեղծվում: Ճիշտն ասած, ուզում եմ բոլորին հիշեցնել, որ նույնիսկ 2008-ի պատերազմի ժամանակ թուրք գործարարները չեն լքել Վրաստանը և շարունակել են երկիր գալ նոր նախագծերով: Նրանք անընդհատ գալիս են, բայց դա անընդհատ ջանք է պահանջում: Ես դեռ տեսնում եմ ֆեյսբուքյան նոր էջեր, որոնք խելահեղ գաղափարներ են տարածում և շահարկումներ անում: Այդ պատճառով ուզում եմ ասել, որ ոչ ոք չի պատրաստվում գողանալ Ռիոնիի ջուրը Թուրքիայի համար․ Վրաստանի այս բնական հարստությունը պատկանում է Վրաստանին: Թուրքական ընկերությունները ներդրումներ են կատարում Բալկաններում, Կենտրոնական Ասիայի երկրներում, և նրանք կպահպանեն իրենց հետաքրքրությունը»,-ասել է թուրք դիվանագետը:

Նշենք, որ ապրիլի 10-ին PolitNavigator–ը հոդված էր հրապարակել, որում բացահայտում էր վրացական իշխանությունների և թուրքական բիզնես-շրջանակների ապօրինի գործողությունները Վրաստանի տարածքում ՀԷԿ կառուցելիս։