Վրաստանում սկսվել է զորավարժություն 12 երկրների, այդ թվում՝ Թուրքիայի ու Ադրբեջանի մասնակցությամբ

Վրաստանում սկսվել է Agile Spirit 2021 վարժությունը, որին մասնակցում են ՆԱՏՕ-ի անդամ 12 երկրներ, ինչպես նաև Ադրբեջանը, Վրաստանը և Ուկրաինան: Այս մասին երկուշաբթի հայտնել է «Ռուսթավի-2» հեռուստաալիքը:

Հեռուստաալիքի տվյալներով՝ «զորավարժությունները պաշտոնապես բացված են»: Դրանց մասնակցում է ավելի քան 2,5 հազար զինծառայող Ադրբեջանից, Մեծ Բրիտանիայից, Գերմանիայից, Վրաստանից, Իսպանիայից, Իտալիայից, Կանադայից, Լատվիայից, Լիտվայից, Լեհաստանից, Ռումինիայից, ԱՄՆ-ից, Թուրքիայից, Ուկրաինայից և Էստոնիայից:

Agile Spirit զորավարժությունները Վրաստանում անցկացվում են ամեն տարի 2011 թվականից ի վեր և կտևեն մինչև օգոստոսի 6-ը: Ըստ հանրապետության պաշտպանության նախարարության՝ այդ զորավարժությունները «ԱՄՆ-ի և ՆԱՏՕ-ի հետ Վրաստանի համագործակցության բաղկացուցիչ մաս են, որի շրջանակներում նրա զինծառայողները վերապատրաստվում են միջազգային խաղաղապահ առաքելություններին մասնակցելու համար»: 2015-ին այս զորավարժություններն առաջին անգամ անցկացվել են ՆԱՏՕ-ի հովանու ներքո, մինչ այդ՝ դրանք վրաց-ամերիկյան էին: