ԱՄՆ պետդեպը հայտարարել է, որ Իրաքում ամերիկյան ռազմաբազայի հրթիռակոծման մեղավորը իրանամետ խմբավորումներն են

ԱՄՆ վարչակազմի կարծիքով` Իրաքի Այն ալ Ասադ ռազմակայանը հրթիռակոծելու պատասխանատվությունը կրում են Իրանի հետ առնչվող խմբավորումները: Այս մասին ուրբաթ հերթական ճեպազրույցում հայտարարել է ԱՄՆ պետքարտուղարության մամուլի ծառայության ղեկավար Նեդ Փրայսը:

«Այն գործողությունները, որոնց մասին մենք խոսում ենք, իրականացվում են Իրանի աջակցությունը վայելող աշխարհազորայինների կողմից»,- ասել է ԱՄՆ արտաքին քաղաքականության խոսնակը:

Ավելի վաղ Politico թերթը, վկայակոչելով երկու ռազմական աղբյուրներ, նշել էր, որ, ըստ ամերիկյան իշխանությունների, «Քաթաիբ Հըզբոլլահ» խմբավորումը կարող է ներգրավված լինել ԱՄՆ զինված ուժերի բազայի հրթիռակոծման մեջ. չորեքշաբթի առնվազն 10 հրթիռ էր ընկել Իրաքի Անբար նահանգի Այն ալ Ասադ ավիաբազայի տարածքում:

Փետրվարի 26-ի գիշերը ԱՄՆ-ն ավիահարվածներ էր հասցրել սիրիա-իրաքյան սահմանի մոտակայքում՝ իրանամետ աշխարհազորայինների թիրախներին: