Ադրբեջանում հայտնվել է իրանամետ «Հուսեյնականների» շարժումը

Իրանական հեռուստաալիքները հաղորդում են Ադրբեջանում իսլամական դիմադրության շարժման՝ «Հուսեյնականների» մասին: Դրոշի տեսքը, որը նման է Թեհրանի աջակցությունը  վայելող շիա բոլոր խմբերի դրոշներին, ուղղակիորեն ցույց է տալիս նրանց ծագումը ԻՀՊԿ-ից. նշում է թելեգրամյան Рыбарь ալիքը:

«Սա հերթական ծպտյալ խմբավորումն է, որը իրանցիները տեղակայում են գրեթե տասնյակներով: Իրաքի փորձը ցույց է տալիս, որ նրանց ողջ գործունեությունը կարող է սահմանափակվել միայն ԶԼՄ-ների գործողություններով և սոցիալական ցանցերում հայտարարություններով: Այնուամենայնիվ, նման կառույցները կատարում են բազայի դեր, որի հիման վրա, անհրաժեշտության դեպքում, ստեղծվում են մարտական ստորաբաժանումներ և քաղաքական թևով լիարժեք կազմակերպություն: Այսպես ձևավորվել է լիբանանյան «Հըզբոլլահը»:

«Հուսեյնականների» ստեղծմամբ Իրանը հիմք է ստեղծում Ադրբեջանի հետ հարաբերությունների կտրուկ վատթարացման դեպքում ընդհատակյա գործունեության, ինչպես նաև այնտեղ արմատացած իսրայելական գործակալներին հակազդելու համար», - նշում է ալիքը:

Հիշեցնենք, որ ՀՀ տարածքում իրանական բեռնատարների հետ կապված սկանդալից հետո լարվածություն է առաջացել Իրանի և Ադրբեջանի միջև: Դրա ֆոնին, Իրանը որոշել է վերջին 20 տարվա առաջին մեծամասշտավ զորավարժություններն անցկացնել Իրանի հյուսիսային սահմաններին: