ԱՄՆ-ն ավիահարվածներ է հասցրել իրանամետ ուժերին Իրաքի և Սիրիայի սահմանին

Պենտագոնի խոսնակ Ջոն Քիրբիի խոսքով՝ ԱՄՆ օդուժը օդային հարվածներ է հասցրել Սիրիայի և Իրաքի սահմանին տեղակայված իրանամետ ուժերի թիրախներին: Համապատասխան որոշումը կայացրել է նախագահ Ջո Բայդենը:

«Նախագահ Բայդենի հանձնարարությամբ՝ այսօր երեկոյան ԱՄՆ-ի զինված ուժերը Իրաքի և Սիրիայի սահմանային շրջանում ճշգրիտ օդային հարվածներ են հասցրել Իրանի աջակցությունը վայելող զինված խմբավորումների թիրախներին»,- ասվում է հայտարարության մեջ:

Ըստ ԱՄՆ պաշտպանության նախարարության՝ այդ խմբավորումների թվում են շիա «Քաթաիբ Հըզբոլլահ»–ը և «Քաթաիբ Սայիդ ալ Շուհադաա»-ն։

«Հաշվի առնելով Իրանի աջակցությունը վայելող խմբավորումների՝ Իրաքում ԱՄՆ-ի շահերը թիրախավորող շարունակական հարձակումները՝ նախագահը հրամայել է հետագայում էլ ռազմական գործողություններ իրականացնել՝  նման հարձակումները կանխելու և զսպելու համար»,- ասել է Ջոն Քիրբին: