Հոդվածի հրապարակումից հետո հրաժարական է ներկայացրել ՀՀ լեզվի կոմիտեի նախագահի տեղակալը

Yerkir.am-ի՝ «Դ. Գյուրջինյանը խժռել է պարգևավճարի համար տրված 19 մլն դրամը» վերտառությամբ հոդվածի հրապարակումից հետո աշխատանքից ազատման դիմում է գրել ՀՀ լեզվի կոմիտեի նախագահի տեղակալ Մարատ Յավրումյանը: Նա այսօրվանից արդեն չի ներկայացել աշխատանքի:

Դեռևս պարզ չէ՝ դրանով Մարատ Յավրումյանին  պատժո՞ւմ են, Դավիթ Գյուրջինյանը ողջ կուժն ու կուլան նրա գլխի՞ն է փորձում ջարդել, թե՞ ինքնակամ է հեռանում՝ փորձելով խուսափել հնարավոր պատասխանատվությունից կամ տհաճ անակնկալներից:

Հիշեցնենք, որ Yerkir.am-ի՝ փետրվարի 12-ի հրապարակման  համաձայն՝ 2019-2020 թթ. ընթացքում Դավիթ Գյուրջինյանը միայնակ կամ տեղակալ Մարատ Յավրումյանի հետ յուրացրել է պարգևավճարների տողով հիմնարկին տրամադրված շուրջ 19 միլիոն դրամը:

Հավելենք նաև, որ, չնայած նշված խնդրի մասին մեր և հիմնարկի կոլեկտիվի բազմաթիվ նամակներին, հրապարակումներին ու հարցադրումներին, ՀՀ լեզվի կոմիտեի ղեկավարությունն անընդհատ խուսափել է բացատրություններ տալուց՝ այդպես էլ չնշելով, թե, ի վերջո, ուր են անհետացել պետական բյուջեից տրամադրված դրամական այդ միջոցները:

Վահե Սարգսյան