«Վրացական երազանքի» հիմնադիր Իվանիշվիլին հայտարարել է քաղաքականությունից հեռանալու մասին

Իշխող «Վրացական երազանք» կուսակցության հիմնադիր, Վրաստանի նախկին վարչապետ Բիձինա Իվանիշվիլին հայտարարել է, որ ընդմիշտ հեռանում է քաղաքականությունից:

«Այսօր գոյություն ունեցող բոլոր քաղաքական սուբյեկտների թվում իշխող թիմն իսկապես լավագույնն է և այլընտրանք չունի: Համոզված եմ, որ այդ մարդկանց թիմը կարող է համարժեքորեն փոխարինել իմ աշխատանքը, հեղինակությունը և հմտությունները: Այդ իսկ պատճառով կարծում եմ, որ իմ առաքելությունն իրականացվել է»,- գրել է Իվանիշվիլին՝ դիմելով ժողովրդին:

2020-ի հոկտեմբերի ընտրություններից հետո «Վրացական երազանքը» կրկին դարձել է իշխող կուսակցություն: Իվանիշվիլիի խոսքով՝ այս արդյունքն իրեն համոզեց, որ ութ տարվա կառավարման ընթացքում ինքը բարձր քաղաքականության էթիկայի նորմեր է բերել երկրի քաղաքական մշակույթ: Այժմ, ինչպես նշել է քաղաքական գործիչը, ինքը կարող է վերադառնալ իր հին ապրելակերպին: Իվանիշվիլին նախկինում զբաղվում էր բիզնեսով և ընդգրկված էր Forbes ամսագրի՝ աշխարհի ամենահարուստ մարդկանց ցուցակում:

«Վրացական երազանքը» առաջին անգամ իշխանության է եկել 2012-ի խորհրդարանական ընտրություններից հետո: