Էրդողանը հայտարարել է, որ Թուրքիան հեռանալու է Սիրիայից երկրում երկարաժամկետ խաղաղություն հաստատելուց հետո

Թուրքիան իր զորքերը դուրս կբերի Սիրիայից այն բանից հետո, երբ այդ երկրում երկարաժամկետ խաղաղություն հաստատվի. հայտարարել է Թուրքիայի նախագահ Ռեջեփ Թայիփ Էրդողանը քաթարական The Peninsula թերթին տված հարցազրույցում:

«Ինչ վերաբերում է Սիրիային, ապա Թուրքիան մտադիր չէ մշտապես մնալ այս երկրում: Հենց հակամարտության երկարաժամկետ լուծում ստանա, մենք կթողնենք այս հողերը»,- ասել է նա:

Միևնույն ժամանակ, Թուրքիայի խորհրդարանը նախօրեին հավանություն է տվել Սիրիայում և Իրաքում գործողություններ իրականացնելու համար զինված ուժերի լիազորությունները մեկ տարով երկարացնելու` կառավարության խնդրանքին: Նախկինում Թուրքիան արդեն իրականացրել է երեք ռազմական գործողություն հարևան Սիրիայի տարածքում՝ «Եփրատի վահան», «Ձիթենու ճյուղ» և «Խաղաղության ակունք»: Արդյունքում` ստեղծվել է անվտանգության բուֆերային գոտի սահմանամերձ Ազազ և Ջարաբլուս քաղաքների միջև, գրավվել է Աֆրինը, իսկ Եփրատ գետից դեպի արևելք ընկած տարածքը վերահսկողության տակ վերցվել: