"Վրացական երազանքի" նախագահի թեկնածուն Գեորգի Մարղվելաշվիլին է

Վրաստանի վարչապետ Բիձինա Իվանիշվիլին օգոստոսի 12-ին պաշտոնապես ներկայացրել է Գեորգի Մարղվելաշվիլիին որպես նախագահի թեկնածու «Վրացական երազանք» իշխող դաշինքից՝ նրան անվանելով «եվրոպական ոճի առաջնորդ», հաղորդում է apsny.ge կայքը:

Մարղվելաշվիլիի նախընտրական քարոզարշավը մեկնարկել է օգոստոսի 12-ին Սենակի շրջանի Նակալակևի գյուղում:

«Մենք պատրաստվում ենք հաղթանակի… Որպես նախագահի թեկնածու ենք ներկայացնում մեր հասարակության արժանի ներկայացուցչի և եվրոպական ոճի առաջնորդի, սույնով կոտրում ենք մեր երկրում տարիներ շարունակ գոյություն ունեցող այն կարծրատիպը, որ նախագահը պետք է լինի այն տիրակալը, որն ամեն ինչ որոշում է բոլորի փոխարեն», – ասել է Իվանիշվիլին:

Վարչապետ Բիձինա Իվանիշվիլին, Մարղվելաշվիլիին բնութագրել է որպես տաղանդավոր, անկախ, քաջ և անմիջական ինտելեկտուալի, ասելով. - «Չնայած՝ նա մշտապես մոտ է եղել քաղաքականությանը, նրան ոչ ոք չի կարող մեղադրել քաղաքական բանսարկություններում: Նա կուսակցության անդամ չէ, և վստահ եմ, որ մեր ապագա նախագահը կպաշտպանի բոլորի շահերը: Համոզված եմ, որ նա արժանապատիվ հաղթանակ կտանի»,

Հիշեցնենք, որ Վրաստանում նախագահական ընտրությունները տեղի կունենան հոկտեմբերի 27-ին: Թեկնածուների պաշտոնական գրանցումը կսկսվի սեպտեմբերի 7-ին: