Գերմանիայի արտգործնախարարը քննադատել է թուրք լրագրողի դատավճիռը

Գերմանիայի արտաքին գործերի նախարար Հայկո Մաասը քննադատել է թուրք լրագրող Ջան Դյունդարի դատավճիռը, որը բացահայտել է պետական գաղտնիքներ. հաղորդում է Haber7-ը:

«Այս որոշումը լուրջ հարված է հասցրել Թուրքիայում լրատվամիջոցների ազատությանը»,- ասել է Մաասը։

Ըստ նրա՝ լրագրությունը մասնագիտություն է, որից հասարակությունը չի կարող հրաժարվել: «Հատկապես՝ երբ մենք գնահատում ենք կառավարության գործողությունները կրիտիկական տեսանկյունից»,- ասել է Մաասը:

Նա նաև նշել է, որ մամուլի ազատությունը հիմնարար իրավունք է, և կոչ արել Թուրքիային՝ կատարել «ԶԼՄ-ների ազատությունն» ապահովելու  պարտավորությունը`համաձայն Մարդու իրավունքների եվրոպական կոնվենցիայի:

Հիշեցնենք, որ Cumhuriyet թերթի նախկին գլխավոր խմբագիր Դյունդարը դատապարտվել է 27 տարի 6 ամիս ազատազրկման Թուրքիայում «քաղաքական և ռազմական լրտեսության» և «զինված ահաբեկչական կազմակերպությանը օգնություն ցուցաբերելու համար». նա 2015 թ. բացահայտել էր Էրդողանի և սիրիացի զինյալների կապը։