ԵԽ նախագահը և Գերմանիայի ԱԳՆ-ն քննադատել են Թուրքիային լրագրողների աշխատանքին խոչընդոտելու համար

Թուրքիայի կողմից օտարերկրյա մի շարք լրագրողների սև ցուցակի մեջ ներառելու և Թուրքիայում նրանց աշխատանքին խոչընդոտելու փաստը քննադատության է ենթարկվել միջազգային հանրության կողմից. տեղեկացնում է Ermenihaber-ը:

Մասնավորապես, ըստ CNNTurk-ի, Թուրքիայի նման գործելաոճը քննադատության է արժանացել Եվրախորհրդարանի (ԵԽ) նախագահի, Գերմանիայի արտգործնախարարության  և մի շարք այլ կառույցների կողմից:

ԵԽ նախագահ Մարտին Շուլցը  գերմանական Bild պարբերականի հետ զրույցում հորդորել է Թուրքիային` ձերբազատվել այդ ցուցակից՝ նշելով, որ այն հակասում է ժողովրդավարության սկզբունքներին:

Թեմային անդրադարձել է նաև Գերմանիայի «Քրիստոնեա- դեմոկրատների  միություն» կուսակցության անդամ, պատգամավոր Կարլ Գեորգ Վելմանը: «Եթե այդպիսի ցուցակ կա, ապա այն անհապաղ պետք է հրապարակվի»,- շեշտել է պատգամավորը:

Իսկ Գերմանիայի արտգործնախարարության խոսնակը իր հերթին նշել է, որ Դաշնային կառավարությունն ակնկալում է Թուրքիայից, որ գերմանացի լրագրողների  աշխատանքին այդ երկրում չեն խոչընդոտի:

Հիշեցնենք, որ ավելի վաղ էլ գերմանական ARD հեռուստաընկերության թղթակցին չեն թույլատրել գնալ Ստամբուլ: Թղթակիցը պատրաստվում էր ռեպորտաժ անել սիրիացի փախստականների մասին: