Հունաստանի արտգործնախարարն անընդունելի է համարել Թուրքիայի «նեոօսմանյան» երազանքները

Թուրքիան նեոօսմանական երազանքներ է հետապնդում, դա անընդունելի է. հայտարարել է Հունաստանի ԱԳՆ ղեկավար Նիկոս Դենդիասը Իտալիայի ԱԳՆ-ի աջակցությամբ անցկացվող «Միջերկրածովյան երկխոսություն» կոնֆերանսի ժամանակ։

Հարցին, թե Հունաստանը մտահոգվա՞ծ է Թուրքիայի գործողություններով, Դենդիասը պատասխանել է, որ Աթենքը «շատ անհանգստացած է»:

«Թուրքիան չի ընդունում միջազգային իրավունքը և չի ընդունում ծովի իրավունքի մասին միջազգային կոնվենցիան: Յուրաքանչյուր երկիր իրավունք ունի ջրային տարածքներում 12 մղոն գոտի ունենալու: Հունաստանը նույնպես ունի այդ իրավունքը: Թուրքիան ասում է, որ դա կլինի casus belli, այսինքն` պատերազմ հայտարարելը, եթե Հունաստանը կիրառի այդ իրավունքը»,- ասել է նա:

Ըստ Դենդիասի` 21-րդ դարում եվրոպական երկրին սպառնում է պատերազմ իր օրինական իրավունքը կիրառելու մտադրության համար:

«Թուրքիայի հետ կապված իրավիճակը չափազանց բարդ է: Նա ցանկանում է անդամակցել Եվրամիությանը: Բայց Թուրքիան նեոօսմանական երազանքներ ունի: Դա մեզ համար անընդունելի է»,- ասել է նախարարը: