«Ճիշտ են անում, որ ՀԴՄ չեն խփում, իսկ ինչու՞ է այդպես»․ գործարարը՝ Փաշինյանին (մաս 3-րդ)

«Չոր մարքեթինգ» սեմինարների շարքի հիմնադիր, գործարար Վահրամ Միրաքյանն արձագանքելով Փաշինյանի հայտարարությանը, գրում է․

«Հայաստանի օրենքները պատժում են ու չեն խրախուսում մեկից ավել բիզնես ունենալը:

Տարօրինակ բան եմ ասում չէ՞: Հիմա հիմնավորեմ:

Եթե ես զբաղվում եմ մի գործունեությամբ, որը ԱԱՀ դաշտում է, ասենք գրեչկա եմ ներկրում, ապա դրան զուգահեռ ցանկացած այլ գործունեության դեպքում, ասենք տուրիստական գործակալություն եմ հիմնում և ունեմ 20 %-ից ավել բաժնեմաս, ապա այդ այլ գործունեությունը հարկվում է ԱԱՀ-ով: ԱԱՀ դաշտում հայտնվելուց հետո ես տուրիստական բիզնեսում մոտ 20 տոկոս ավելի շատ եմ հարկվելու, հետևաբար` մրցակիցներից մոտ 20 տոկոսով ավելի թանկ եմ վաճառելու ու պարտվելու եմ մրցակցության հարցում:

Ի՞նչ կապ ունի տուրիստականը գրեչկա ներկրելու հետ: Ոչ մի: Բայց քցում են նույն հարկային դաշտ:

ԱԱՀ դաշտում ես հայտնվում նաև 2 օրինական բիզնես ունենալու դեպքում (տես նկարում Սամվելի բերած օրինակը): Ստացվում է, մենք օրենսդրական դաշտով խեղդում ենք ցանկացած գործարարի, ով իր ոլորտից բացի այլ նախաձեռնություն ունի:

Արդյունքում կամ նկարի օրինակի նման մարդիկ հիասթափվում են ու դադարեցնում են գործունեությունը կամ էլ ուրիշի անունով են հիմնում այլ ընկերությունը: Հետո էլ հարկայինը գալիս, Ամերիկա հայտնաբերած Կոլոմբոսի դեմքով ասումա երկուսն էլ քո բիզնեսնա, դու էլ քրեական հանցագործ ես: Առը հաա:

Ժամանակին էս օրենքը չինովնիկների համար շատ շահութաբեր էր, քանի որ հարկայինի «հայտնագործությունից» հետո տվյալ հարկայինի աշխատղը մի կոռուպցիոն բունուս էր ստանում ու այդ թեմայով էլ ձեն չէր հանում, մինչև իրա տեղն այլ մարդ կգա ու կգնա իր բոնուսի հետևից: Հիմա բոնուսների հավանականությունը շատ կտրուկ նվազել է, բայց բոնուսներ խրախուսող ախմախ օրենքները դեռ տեղում են:

Ֆիննախի տրամաբանությունը հասկանում եմ, ժամանակին ԱԱՀ բիզնես ունեցողներն իրենց բիզնեսը բաժանել են մի քանի շրջհարկով բիզնեսների ու ԱԱՀ չեն վճարել, ինչի պատճառով էլ ֆիննախը որոշել է աչքը բուժել... գլուխը կտրելուց հետո:

Հիմա ժամանակներն այլ են, պետքա աչքը բուժել առանց գլուխը կտրելու: Հետևաբար օրենքը պետքա թույլ տա, որ ՀՀ ցանկացած քաղաքացի ունենա տարբեր բիզնեսեր ու չքցի դրանք ԱԱՀ հարկային դաշտ: Եթե բիզնեսները տարբեր են, նշանակում է պետք է կարողանան մրցակցել, հետևաբար տուրիստականը պետքա կարողանա մրցակցել այլ տոիրիստականների հետ, ինչ կապ ունի, որ հիմնադիրը այլ ոլորտում էլ բիզնես ունի:

Լուծումն օրենքն է, ըստ որի, եթե գործարարը տարբեր ոլորտներում տարբեր բիզնեսներ ունի, ապա դրանք պետք է գործեն իրարից անկախ հարկային դաշտերում: Իսկ, եթե նույն ոլորտում են գործում տարբեր ՍՊԸ-ները, ապա թող գործի ներկա օրենսդրական դաշտը:

Ասեմ, որ մենք Mantashov Entrepreneurs Union ի ընկերներով օրենսդրի ըներների հետ աշխատում ենք վերոնշյալ հիմար օրենքի փոփոխության ուղղությամբ:

ՀԳ. Ով համամիտ է` տարածեք, ով հանդիպել է էս խնդրին` +»:

Առաջին մասը՝ այստեղ

Երկրորդ մասը՝ այստեղ