«Հաջողությունների գրավականը միասնությունն է, համախմբվածությունը». Դավիթ Իշխանյան

«Հաջողությունների գրավականը միասնությունն է, համախմբվածությունը». վստահ է ԱՀ նախագահի թեկնածու, ՀՅԴ-ն ներկայացնող Դավիթ Իշխանյանը:

ԱՀ կայացման տարիներից ի վեր դաշնակցությունը քաղաքական մի շարք կուսակցությունների հետ մասնակցում է խորհրդարանական ընտրություններին եւ նպաստում պետականաշինության գործընթացին՝ ինչ-որ տեղ մաս կազմելով իշխանությանը, իսկ երբեմն էլ հանդես գալով որպես ընդդիմություն։ Մարտի 31-ին կայանալիք համապետական ընտրություններում կուսակցությունն առաջին անգամ նախագահի թեկնածու է առաջադրել՝ մտնելով մրցակցային պայքարի մեջ։ Թիմակիցներն այդ պատիվը վստահել են ՀՅԴ Արցախի ԿԿ ներկայացուցիչ, ԱԺ պատգամավոր, խորհրդարանում «Դաշնակցություն» խմբակցության անդամ, արցախյան ազատամարտի ակտիվ մասնակից, «Մարտական խաչ» առաջին աստիճանի շքանշանակիր Դավիթ Իշխանյանին, ով նախընտրական հանդիպումներն սկսել է ծայրամասային բնակավայրերից եւ առաջնորդվում է «Մենք հաղթել ենք միասին, չենք զիջի միասին եւ կզարգանանք միասին» կարգախոսով։

«Մեզ համար ազգային ազատագրական պայքարը միշտ էլ եղել է գործունեության առանցք եւ փորձել ենք մեր շուրջը համախմբել բոլոր այն նվիրյալ անձանց, ովքեր պատրաստ են հանուն հայրենիքի՝ անձնազոհության գնալ,– ասում է նախագահի թեկնածուն,–Դաշնակցությունն իր մեջ ամբողջացնում է թե՛ ազատամարտիկի, թե՛ մշակութային գործչի, թե՛ բանվորի, թե՛ ուսուցչի եւ թե՛ աշխատավոր գյուղացու կերպարը։ Եվ, իմ պատկերացմամբ, նա իրոք, ազատամարտիկ է ինչպես պատերազմի դաշտում, այնպես էլ տնտեսական ճակատում, մշակույթի ասպարեզում, հասարակական կյանքի բոլոր ոլորտներում»։

Կուսակցության առաջնորդի համոզմամբ՝ միասնությունն ու համախմբվածությունն են հաջողությունների գրավականը եւ երկրի ապագան կանխորոշելու համար ուրիշ ձեւաչափ ու այլ ելք գոյություն չունեն։ «Եթե չենք յուրացրել այդ պարզ կարգախոսը, ուրեմն անհաջողություններն ու կորուստները միշտ անխուսափելի են»,–կարծում է նա՝ ընդգծելով այն իրողությունը, որ «երբ մեզ լքել են միասնության ոգին եւ համախմբման ուժը, ցավալի պարտություններ ենք կրել»։ Դ. Իշխանյանի հավաստմամբ՝ դաշնակցությունն իր գործունեության ողջ ժամանակահատվածում ապացուցել է, որ ամենադժվարին, ճակատագրական պահերին մշտապես կանգնած է եղել ժողովրդի կողքին եւ այսօր էլ պատրաստ է հետեւողականորեն իրականացնել հայրենիքի հզորացմանն ու շենացմանն ուղղված ծրագրերը, անշահախնդիր ծառայել պետությանը։

Դաշնակցության հավաստմամբ՝ ԱՀ արտաքին քաղաքականության բնագավառում առաջնահերթ խնդիրը խաղաղ ճանապարհով Արցախի հիմնախնդրի լուծումն է՝ երկրում անցկացվող համաժողովրդական հանրաքվեների եւ Սահմանադրության հիման վրա, միջազգային իրավունքի սկզբունքների եւ նորմերի շրջանակներում։ Եվ հակամարտության կարգավորման, Արցախի խնդրի արդարացի լուծման նպատակով Դ. Իշխանյանն առաջարկում է պետության նախաձեռնությամբ, համահայկական մակարդակով մշակել եւ ընդունել հայեցակարգ՝ համախմբելով հայրենիքի եւ սփյուռքի ողջ ներուժը։ Դաշնակցությունը լիահույս է, որ «Հայաստանի Հանրապետությունը կշարունակի լինել Արցախի անկախության եւ անվտանգության երաշխավորը, կարծում է, որ ՀՀ եւ ԱՀ միջեւ մի օր անպայման ռազմաքաղաքական համագործակցության պայմանագիր կկնքվի»։ Ինչ վերաբերում է բանակցային գործընթացի ձեւաչափին, ապա Արցախի Հանրապետությունը, որպես լիիրավ կողմ, անպայման պիտի մասնակցի ակնկալվող բանակցություններին։

Դավիթ Իշխանյանը եւ նրա թիմի անդամները ելակետային խնդիրների համատեքստում են դիտարկում եւ երկրի անվտանգության ու պաշտպանության հիմնահարցերը. «Ազգ-բանակ հայեցակարգը պետք է լինի ժողովրդի բարոյահոգեբանական սկզբունքների կերտման հիմնական ուղղությունը»։
Դաշնակցությունը կրթության եւ գիտության դերը տեսնում է նախեւառաջ երկրի անվտանգության, տնտեսական եւ ռազմական հզորացմանը ծառայելու մեջ։ Կուսակցությունը շատ է կարեւորում գիտական եւ գիտատեխնիկական ներուժի զարգացումը, գիտության, կրթության եւ արտադրության ինտեգրումը. «Մենք կարծում ենք, որ կրթության համակարգն էական բարեփոխումների կարիք ունի, եւ անհրաժեշտ է նոր մակարդակի բարձրացնել կրթական համակարգում հայրենասիրական եւ ազգային դաստիարակություն պարունակող ծրագրերն ու նախաձեռնությունները։ Միաժամանակ պետք է ընդլայնել նախադպրոցական կրթության համակարգը՝ բացելով նոր մանկապարտեզներ։ Անդրադառնալով բարձրագույն ուսումնական հաստատություններում ակնկալվող բարեփոխումներին, կարծում եմ, ժամանակն է՝ անցնելու անվճար բուհական կրթության, խթանելու համագործակցությունն ու ինտեգրումը ՀՀ եւ միջազգային գիտական կենտրոնների հետ, բարելավելու ուսանողների կենցաղային եւ հանրակացարանային պայմանները եւ բուհական ինքնավարությանն օժտելու լայն հնարավորություններով»։

Ընտրողների վստահությանն արժանանալու դեպքում դաշնակցությունը մտադիր է պետաիրավական եւ պետական կառավարման համակարգում իրականացնել լուրջ փոփոխություններ եւ հասնել համակարգի կատարելագործման եւ ադյունավետության բարձրացման, նոր Սահմանադրության ընդունմամբ ապահովել օրենսդիր, գործադիր եւ դատական իշխանությունների կենսագործունեությունը, խրախուսել ժողովրդի մասնակցությունը պետական կառավարմանը, եւ ապահովել կառավարման համակարգի ապակենտրոնացում, որը ժողովրդավարության իրական հիմքն է։
ՀՅԴ-ն երկրի տնտեսական զարգացման գլխավոր խնդիրը համարում է բնակչության սոցիալ-տնտեսական վիճակի արմատական բարելավումը։ Ըստ կուսակցության ղեկավարի՝ անհրաժեշտ է մշակել «ռազմավարական առաջնահերթությունների վրա հիմնված ազգային տնտեսական անվտանգության հայեցակարգ», որտեղ հստակ արտահայտված կլինի պետություն-մասնավոր գործընկերային հարաբերությունը։ Նրա խոսքով՝ երկրում որեւէ տնտեսավարող սուբյեկտ չպետք է դուրս մնա օրենքի ենթակայությունից։ Միեւնույն ժամանակ անհրաժեշտ պայքար պետք է տարվի մենաշնորհների եւ մենատիրության դեմ։

«Ազատ հասարակարգ ստեղծելու համար անհրաժեշտ է խորացնել պետության միջամտությունը շուկայական տնտեսության մեջ,–ասում է Դ. Իշխանյանը,-Ազատ շուկայի գործունեությունը ոչ միայն չի բացառում կառավարության միջամտությունը, այլեւ այն դարձնում է անհրաժեշտ»։ Կուսակցությունը գտնում է, որ հզոր երկիր կառուցելու հիմնական գրավականը գյուղերի զարգացումն է։ Ասել է թե՝ գյուղատնտեսության եւ գյուղի զարգացումը շաղկապված են, եւ արցախյան գյուղերը պետք է վերածվեն կայուն եկամտաստեղծ բնակավայրերի։ Իսկ որպեսզի փոխգործակցության արդյունքները լինեն շոշափելի եւ համոզիչ, անհրաժեշտ է ագրարային ոլորտում խրախուսել մանր գյուղացիական տնտեսությունների միջեւ կոոպերացիոն կապերի ստեղծումը եւ ընդլայնումը. «Այդ տնտեսությունները պետք է գտնվեն կառավարության հոգածության ներքո, որոնք իրենց շուրջը կհամախմբեն գյուղական մտավորականների եւ զինծառայողների ընտանիքներին»։

Ինչպես հանրապետությունում գործող մյուս կուսակցությունների, այնպես էլ դաշնակցության նախընտրական ծրագրում առանձին տեղ է զբաղեցնում կոռուպցիայի եւ հովանավորչության դեմ պայքարը՝ այն դիտարկելով որպես աղքատության վերացման, իրական ժողովրդավարության, երկրի կայուն զարգացման, քաղաքացիական հասարակության կայացման, սոցիալական արդարության եւ համերաշխության, օրենքի գերակայության հաստատման հիմնական գրավականներից մեկը։ ԱՀ նախագահի թեկնածու Դ. Իշխանյանն առաջարկում է կոռուպցիան կանխարգելելու նպատակով մշակել եւ ընդունել համապատասխան հայեցակարգ՝ գիտական, տնտեսական, հասարակական եւ քաղաքական հիմնավորումներով։

Դավիթ ՄԻՔԱՅԵԼՅԱՆ

aparaj.am