Սկզբունքային դիրքերում, բայց արտահայտելով մեր միասնականությունն ու համախմբվածությունը

Մի շարք լրատվամիջոցներ դիմել են ՀՅԴ մամլո դիվանին` խնդրելով պարզաբանել, թե ինչո՞ւ է ՀՅԴ Արեւմտյան Ամերիկայի Կենտրոնական կոմիտեն խիստ գնահատականներով հայտարարություն ընդունել եւ հրաժարվել է մասնակցել Լոս Անջելեսում ՀՀ անկախության 20-ամյակին նվիրված ճաշկերույթին:

Այդ կապակցությամբ ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանը պատասխանել է. «Հայտարարությունն արտահայտում է Կենտրոնական կոմիտեի դիրքորոշումը եւ թերեւս արդյունք է գաղութում առկա որոշակի տրամադրությունների։ Հասկանալի է, որ ՀՀ-ում կուտակվել են բազմաթիվ հիմնահարցեր, առկա են բազմաթիվ չլուծված խնդիրներ։

Բայց 20-ամյա տարելիցը մեր ընդհանուր հաղթանակի եւ ձեռքբերումների ամրագրումն է։ Մենք իրավունք չունենք այս մակարդակի միջոցառումներում, անձնավորված հարաբերություններով եւ հուզական քայլերով առաջնորդվելու, այլ առիթը պետք է օգտագործենք, մնալով հանդերձ մեր սկզբունքային դիրքերում, նման միջոցառումներով արտահայտելու մեր միասնականությունն ու համախմբվածությունը»: