ՏԵՍԱՆՅՈՒԹ․ Աղքատությունը գլխից հանելը անհրաժեշտ, բայց ոչ բավարար պայման է․ Վաչե Գաբրիելյան

Բոլոր քաղաքացիները պետք է իրենց գլխից հանեն աղքատությունը՝ սա անհրաժեշտ, բայց ոչ բավարար պայման է՝ ըստ Yerkir.am-ի, ասաց ՀՀ նախկին փոխվարչապետ Վաչե Գաբրիելյանը ՀՅԴ նախաձեռնած՝ ՀՀ սոցիալ-տնտեսական զարգացման խնդիրներին նվիրված համաժողովի ընթացքում։

«Ես չեմ կարծում, որ եթե ինչ-որ մեկն իր գլխից աղքատությունը չի հանել, նա հնարավորություն ունի աղքատությունից դուրս գալու։ Սակայն պետք է հաշվի առնել, որ կան շատ շուկայական անհարթություններ և փորձություններ, որոնց հետևանքով հնարավոր չէ միանգամից աշխատուժը անմիջապես մտցնել շուկա և բացի դրանից հնարավոր չէ նրանց տալ այն ունակությունները, որոնք կարող են օգտագործել բարձր վճարվող աշխատատեղեր ստանալու համար»,-ասաց Վաչե Գաբրիելյանը։

Նրա համոզմամբ, այս ուղղությամբ պետությունը ստեղծելիք պայմանների մեջ չպետք է լինեն միայն խաղի արդար կարոններ, նաև պետք է լինեն այնպիսի պայմաններ, ինչպիսիք են ակտիվ աշխատանքային շուկայի քաղաքականությունը, որտեղ վերապատրաստումների խնդիր կա, գործատուների աշխատանքի հետ կապված խնդիր կա, և այդ ուղություններով պետությունը գումարներ պետք է ծախսի։

Խոսելով Պարտադիր կուտակային կենսաթոշակային համակարգի մասին, նա ընդգծեց, որ մեզ մոտ գոյություն ունեցող կենսաթոշակային համակարգը միայն պարտադիր կուտակայինը չէ, այն եռաստիճան է և պարտադիր կուտակայինը զուգորդվում է նաև առաջնային սյունով, որով հավասարաչափ պաշտպանությունը որոշակի մինիպալ մակարդակով տրամադրվում է բոլորին։

«Ինչո՞ւ է պարտադիր կուտակային անհրաժոշտություն դարձել, որովհետև դեմոգրաֆիան, որը փոխվել է 20-րդ դարավերջին և այլևս նման չէ բիսմարկյան ժամանակին կամ 1930-ականների ԱՄՆ-ին, հնարավորություն չի ընձեռում սերունդների համերաշխության մոդելի կիրառման համար։ Որովհետև եթե դա դնում ենք պետության ուսերին, այն, ի վերջո  դառնում է շատ ավելի մեծ բեռով ներկա դեմոգրաֆիական հարցերին պատասխանելու համար և հնարավորւթյուն չի տալիս այլ ճյուղերում զարգացման։ Իմ կարծիքով, պետությունը պետք է ունենա հիմիկվանից շատ ավելի մեծ մասնաբաժին վերաբաշխման տեսակետից, բայց եթե ավելացնում ենք նաև կենսաթոշակային բեռը, որն ամենամեծն է, զարգացման այդ հնարավորություններն էապես խեղվում են և հնարավորություն չի լինում զարգացման գործառույթներն իրականացնելու»,-ասաց Վաչե Գաբրիելյանը։

Եկամտահարկի համահարթեցման հարցին անդարադառնալով՝ Վաչե Գաբրիելյանն ասաց՝ եկամտային հարկը պետք է  լինի պրոգրեսիվ, հարթ եկամտային համակարգը բավարար եկամուտներ  գեներացնելու և  ըստ անհրաժեշտության բաշխելու հնարավորություն չի ընձեռում:

«Խնդիրը զուտ արդարացիությունը կամ խթանները չեն, խնդիրը հենց ծախսեր անելու հնարավորություն ընձեռելն է և դրանից բացի նաև դինամիկ հավասարակշռություն ապահովելը, որովհետև բևեռացվածությունը մեծանում է»,- ասաց նա:

Ազգային տնտեսության խթանման տեսանկյունից պրոգրեսիվ համակարգը եկամուտներն  ավելի հավասարաչափ է բաշխում տարբեր խավերի միջև և տեղական ծառայությունների և ապրանքների նկատմամբ  ներկայացված պահանջարկը լինում է ավելի մեծ՝ համոզված է Վաչե Գաբրիելյանը:

«Այդ առումով  տնտեսական ավելի հավասար  զարգացում է ապահովում: Դա լինում է  թե ներառական, թե ավելի կայուն ու հաստատուն տնտեսական զարգացման տեսակետից»,- ասաց նա:

Նշենք, որ ՀՅԴ Հայաստանի Գերագույն մարմինը՝ կարևորելով Հայաստանի սոցիալ-տնտեսական զարգացման առկա խնդիրների իրական լուծումներին ուղղված շահագրգիռ երկխոսությունը, նախաձեռնել է քննարկումների շարք։ Համաժողովին մասնակցում են խորհրդարանական և արտախորհրդարանական, իշխանական և ընդդիմադիր քաղաքական ուժերի, քաղաքացիական հասարակության, մասնագիտական և փորձագիտական լայն շրջանակի ներկայացուցիչներ:

Մանրամասն՝ տեսանյութում․