Կոռուպցիայի դեմ պայքարում կա առաջընթաց. Վաչե Գաբրիելյան

ՀՀ փոխվարչապետ Վաչե Գաբրիելյանն այսօր լրագրողների հետ զրույցում, խոսելով կոռուպցիայի դեմ պայքարի մասին, ընդգծեց, որ  կոռուպցիայի դեմ պայքարում կառավարությունը աշխատանքներ տանում է և կա առաջընթաց: «Երբ խոսքը գնում է կոռուպցիայի դեմ պայքարի մասին, կա երկու կողմ: Առաջինը` մարդիկ ուզում են պաշտոնյաներին տեսնել փողոցում և կան համակարգային մոտեցումներ, որոնք վերացնում են կոռուպցիոն հնարավորությունները: Կառավարությունը միտված է համակարգային լուծումների և աշխատանքներ տարվում են, կա առաջընթաց և կոռուպցիոն հանձնաժողովը դրա մասին տեղեկացնում է»,- ասաց նա: Հարցին, թե  ՀՀ կառավարությունը չի՞ ցանկանում կոռումպացված պաշտոնյաներին տեսնել փողոցում՝ Վաչե Գաբրիելյանը պատասխանեց. «ՀՀ կառավարությունը ցանկանում է, բայց չի ցանկանում ֆետիշացնել այդ կողմը: Եթե փաստեր լինում են, բնականաբար, կոռումպացված պաշտոնյաները պետք է հայտնվեն փողոցում»:

Լրագրողները հորդորեցին կոռումպացված պաշտոնյաների անուններ տալ, ինչին ի պատասխան Վաչե Գաբրիելյանն էլ իր հերթին լրագրողներին դիմեց՝ դուք ավելի լավ կիմանաք: