Սեպտեմբերին ստեղծված կառավարությունը չէր կարող անմիջապես փոփոխություններ մտցնել. Վաչե Գաբրիելյան

Արդեն հայտնել ենք, որ 2017 թվականի բյուջեի քննարկման ընթացքում ՀԱԿ խմբակցության քարտուղար Արամ Մանուկյանը հայտարարեց, որ պետական ապարատը ուռճացված է, և վերանայման կարիք կա: Փոխվարչապետ Վաչե Գաբրիելյանը, արձագանքելով պատգամավորի ասածին, նշեց, որ սեպտեմբերից արդեն իսկ կրճատված է չորս ԾԻԳ և մի քանի ՊՈԱԿ:

«Այսօր, կառավարության վերջին ԾԻԳ-ն էլ կրճատվեց: Նմանատիպ գործընթացն այժմ կառավարության ուշադրության կենտրոնում է»,- ասաց նա:

Գաբրիելյանի խոսքով՝ պարբերաբար վերանայման են ենթարկվում կառավարման բոլոր կառուցվածքները, վարկային բոլոր ծրագրերը` դրանք արդյունավետ և նպատակաուղղված դարձնելու համար:

«Նաև ծառայողական մեքենաների մասով ասեմ` մինչ այսօր ամբողջ համակարգում կրճատվել է 791 մեքենա, իհարկե, դրանց մեջ եղել են նաև չօգտագործվող»,- ասաց փոխվարչապետը:

Անդրադառնալով կարմիր գծերի և տեսախցիկների թեմային՝ Գաբրիելյանը վստահեցրեց, որ այդ ոլորտների գումարները հոսելու են բյուջե: «Այն հարցերը, որոնք արծարծում են պատգամավորները, տեղ են գտել և գտնելու են կառավարության ծրագրերում: Սեպտեմբերին ստեղծված կառավարությունը չէր կարող բյուջետային իներցիայում անմիջապես փոփոխություններ մտցնել: Նոր փոփոխությունները միանգամից հնարավոր չի լինի անել: Ըմբռնումով մոտեցեք, հասկացեք սահմանափակումներն ու հնարավորությունները: Դրանց շրջանակում արվել է առավելագույնը»,- եզրափակեց Վաչե Գաբրիելյանը: