Կուտոյանը նորանկախ Հայաստանի մահացած հայտնաբերված ԱԱԾ երկրորդ ղեկավարն է

Քիչ առաջ տեղեկություն ստացվեց, որ հրազենային վիրավորումից մահացել է ԱԱԾ նախկին պետ Գեորգի Կուտոյանը: Կուտոյանը նշանակվել էր 2016 թ. փետրվարի 12-ին՝ երրորդ նախագահ Սերժ Սարգսյանի կողմից:

Վերջին մեկ տարում սա երկորդ դեպքն է, երբ կասկածելի հանգամանքներում հրազենից մահացան ուժային կառույցների բարձրաստիճան դեմքեր: Առաջինը 2019 թ. սեպտեմբերի 23-ին Բջնիի իր առանձնատանը մահացած էին գտել ՀՀ նախկին ոստիկանապետ Հայկ Հարությունյանը, ով մարտի 1-ի գործով գլխավոր վկաներից էր և նախկին նախագահ Ռոբերտ Քոչարյանի ու նրա ենթակաների դատավարության ժամանակ ի թիվս այլ վկաների, պետք է ցուցմունք տար։

2018 թ. ապրիլ-մայիս ամիսներին տեղի ունեցած ներքաղաքական իրադարձություններից և Նիկոլ Փաշինյանի իշխանության գալուց հետո Կուտոյանին փոխարինել էր Արթուր Վանեցյանը:

Հայաստանի նորանկախ Հանրապետության պատմության մեջ սա երկրորդ դեպքն է, երբ սպանվում է ԱԱԾ նախկին պետը: 1993 թ. հունիսի 21-ին Կոմիտասի անվան պանթեոնի տարածքում վանոսիրադեղյանական բանդայի կողմից սպանվեց ՀԽՍՀ ԿԳԲ պետ գեներալ-լեյտենանտ Մարիուս Յուզբաշյանը, ում սպանություն ցօրս բացահայտված չէ: