Սիրիայի հյուսիսից ամերիկացի զինվորականների հեռանալը չի նշանակում, որ ԱՄՆ-ն սկսել է զորքը դուրս բերել այդ երկրից. Սպիտակ տան ներկայացուցիչ

Սիրիայի հյուսիս-արևելքում Թուրքիայի գործողությունների գոտուց ամերիկացի զինվորականների հեռանալը դեռևս չի նշանակում, որ ԱՄՆ-ն սկսել է իր զորքը դուրս բերել այդ երկրի տարածքից. հայտնում է ՏԱՍՍ-ը՝ վկայակոչելով ամերիկյան վարչակազմի բարձրաստիճան ներկայացուցչի խոսքերը։ 

«50-ից 100 զինծառայողի դուրսբերումը Սիրիայից զորքերի պաշտոնական դուրսբերման սկիզբը չէ»,- պարզաբանել է պաշտոնյան:

Նրա խոսքով՝ Վաշինգտոնում ձգտում են ամերիկացի զինվորականներին շուտափույթ հայրենիք վերադարձնել, սակայն «այս պահին նման գործողությունների ժամանակը չէ»: Վարչակազմի ներկայացուցիչը մանրամասնել է, որ ամերիկացի զինծառայողները կտեղափոխվեն Սիրիայի այլ շրջան, այլ ոչ թե դրա սահմաններից դուրս:

Ընդ որում, նա նաև շեշտել է, որ ԱՄՆ-ը չի պաշտպանում Թուրքիայի գործողությունները Սիրիայի հյուսիսում:

Հիշեցնենք, որ ավելի վաղ Սպիտակ տունը պաշտոնապես հաստատել էր ԱՄՆ զինված ուժերի դուրսբերումը Սիրիայի հյուսիսային շրջանից, որտեղ Անկարան մտադիր է ռազմական գործողություններ սկսել:

Ի պատասխան՝ Վաշինգտոնից ասել են, որ ամերիկյան իշխանությունները չեն աջակցի և որևէ կերպ չեն մասնակցի Սիրիայի հյուսիսում Թուրքիայի ռազմական գործողությանը: