Ռուսական զորքերն ամբողջությամբ դուրս են բերվել Ուկրաինայի հյուսիսից. բրիտանական հետախուզություն

Հյուսիսում ռուսական զորքերն արդեն ամբողջությամբ դուրս են բերվել Ուկրաինայից դեպի Բելառուս և Ռուսաստան։ Այդ ուժերի առնվազն մի մասը կտեղակայվի Ուկրաինայի արևելքում՝ Դոնբասում կռվելու համար. հայտնում է Մեծ Բրիտանիայի պաշտպանության նախարարությունը:

Ըստ բրիտանական հետախուզության տվյալների՝ այդ ուժերից շատերը զգալի ուժեղացման կարիք կունենան, մինչ պատրաստ կլինեն տեղակայվելու արևելքում, և հյուսիսից ցանկացած զանգվածային վերատեղակայում, հավանաբար, կպահանջի առնվազն մեկ շաբաթ:

Նշվում է, որ ռուսական կողմից արևելյան և հարավային քաղաքների գնդակոծությունները շարունակվում են, և ռուսական զորքերը հարավ են շարժվել ռազմավարական նշանակություն ունեցող Իզյում քաղաքից, որը մնում է նրանց վերահսկողության տակ։