Թուրք-լիբիական լարվածություն. Թուրքիան սպառնում է Լիբիային

Թուրքիա-Լիբիա հարաբերություններում լարվածությունը շարունակվում է: Շաբաթ օրը գեներալ Հալիֆե Հաֆթարի ենթակայության տակ գտնվող գրոհայինների խոսնակը Թուրքիային «օկուպանտ» էր անվանել և սպառնացել, որ կոչնչացվեն թուրքական նավերը, կարգելվի թուրքական ինքնաթիռների մուտքը լիբիական օդային տարածք, իսկ երկրում գտնվող Թուրքիայի քաղաքացիները կձերբակալվեն:

Թուրքիայի արտաքին գործերի նախարարությունը հայտարարություն է տարածել, որում պահանջվում է ազատ արձակել Թուրքիայի 6 քաղաքացիներին:

«Լիբիայում Հաֆթարի անօրինական աշխարհազորային ուժերի կողմից մեր քաղաքացիների ձերբակալումը խուլիգանություն և ծովահենություն է: Ակնկալում ենք մեր քաղաքացիների` անմիջապես ազատ արձակումը: Հակառակ դեպքում` Հաֆթերի ուժերը կդիտարկվեն որպես օրինական թիրախներ»,- Թուրքիայի ԱԳՆ-ի հայտարարությունն է մեջբերում «Սպուտնիկ»-ի թուրքական ծառայությունը: